eSefarad Noticias del Mundo Sefaradi
El muevo numeró de «Aki Yerushalayim» ya está akí!
Lo tenésh en dos formatos elektrónikos:
-
- Formato pdf interaktivo ke lo puedésh abashar a vuestro komputer Aki
- Formato flipbook: https://online.fliphtml5.com/
pqzor/tlrt/#p=1
LETRA DE LOS REDAKTORES:
Keridos lektores,
Este numeró de “Aki Yerushalayim” lo dedikamos a Avner Perez en su ochenten aniversario.
El Dr. Perez es investigador de la literatura djudeo-espanyola i su istoria, poeta, traduktor, i es el fondador i direktor del Instituto Maale Adumim para la dokumentasión de la lingua djudeo-espanyola i su kultura.
Perez se okupa del deskuvrimiento, deshiframiento i publikasión de manuskritos en djudeo-espanyol (lo mas en soletreo) de una manera ke enrikese el konosimiento kon la diversidad de la literatura ladina. Estos materiales los tiene publikado i kontinua a publikarlos en diezes de artíkolos.
La korona de su lavoro de munchos anyos en el kampo del djudeo-espanyol sería el “Trezoro de la lingua djudeo-espanyola durante todas las epokas i en todos sus djéneros” – diksionario amplio i istóriko en Internet. En el kual fueron introdusidas asta agora 60,000
entradas prinsipalas (palavras) i sigundarias (lokusiones) i 75,000 sitasiones de la literatura i la prensa en djudeo-espanyol.
El Dr. Perez tiene resivido munchos premios tanto por su investigasión akadémika, komo por sus poemas i traduksiones de poemas.
Por la okazión de su ochenten aniversario (en djunio 2022), keremos, kon este numeró muevo de “Aki Yerushalayim”, azer un omenaje a Avner Perez. Aparte de un artíkolo muevo ke mos tiene eskrito sovre la interpretasión de las ilustrasiones en la portada de la Bíblia de Ferrera, desidimos de inkluir en el numeró prezente una seleksión de sus ovras ke fueron publikadas en muestra revista a lo largo de los anyos.
Avner Perez nasió en Yerushalayim en 1942 a una famiya ke mora ayá desde 1876. En su artíkolo kaptivante “De Yerushalayim a Aragón”, ke trayemos akí de muevo, deskuvre medio un lavoro investigativo, las raízes de su famiya, desde Aragón en 1391 vía Montpellier i Salóniko asta Yerushalayim.Este artíkolo fue publikado orijinalmente en el numeró 46 de “Aki Yerushalayim” en 1992. En el mizmo numeró, Perez empesó a publikar su “katoniko de soletreo”, ke aperesió en kaji todos los numerós sigientes. Desidimos de inkluir akí este primer kantoniko de soletreo. También dedikamos a Perez dos seksiones del prezente numeró. En la seksión de proza literaria vos trayemos los primeros sesh kapítolos de su lavoro en korso “Djohá o Otniel Hodja – el prínchipe deskalso”, i en el la seksión de Poezía – 4 de sus poemas orijinales.
Además de esto, vos ofresemos una buena seleksión de kontenidos en varios djéneros. Esperemos ke lo gozésh.
ANYADA BUENA I DULSE I MUEDES ALEGRES!
Aldo Sevi
en el nombre del ekipo editorial
