eSefarad Noticias del Mundo Sefaradi
Erensia Sefardi Vol 16, Nº 3 -2008
Editor: Dr. Albert de Vidas
Editorial
El govierno Grego adopto una ley ke permite a las sivdades i aldeas del pais de unirsen en una “Red de Sivdades i Aldeas de Gresya martirisadas en 1940-1945” La lista está kompilada para onorar las viktimas de la brutalidad Almana durante l’okupasion de paez i para servir komo una giya istorika i edukativa para las muevas djunerasiones. Alavamos el gobierno Grego por esta aksion.
El uniko problema es ke el anti-Semitismo kontinua a alevantar su kavesa en Salonika, desde el ke el alkalde de esta sivdad –ke un tiempo era sivdad Sefardita antes de la okupasion Grega- refuso de unirse a la lista en nombre de los 55.000 djidios ke bivyeron ayí i ke fueron asesinados por los Almanes i sus aliados lokales. La eskusa del alkalde George Papageorgopoulos es ke la eksterminasyon de los Sefardis akontesio en los kampos de eksterminasion i no en la sivdad de Salonika, i ke los djidyos bivyeron en Salonika por solo 500 anyos.
Según el Kongreso Djudyo Mundial, el Konsejo Sentral de los Djidyos de Gresya protesto esta desisyon kayosa del alkalde no solo komo “una insulta a la memorya del djudyos ma también un rekordatorio de los tiempos tristes de la okupasiyon ke algunos kieren olvidae porke eran las viktimas i ke otros keren olvidar por sus rasones propias”. Munchos gregos lokales aprovecharon de la eksterminasyon de los Sefardis para enrikesersen.
El enverano pasado el partido de la oposisyon “Salonika para sus Suidadinos i la Ekologia” perkuro de sumar la sivdad a la Red, munchos en la prensa local kritikaron la sisyon del alkalde komo “un insulto a la memorya de la djudyos i un falto fundamental del konosimyento de la istorya”.
Estamos kontente ke la chika comunidad Sefardi de unos 1.000 miembros esta resiviendo el apoyo de los Gregos Kristianos en su kombate contra la desisyon del alkalde Papageorgopoulos.
Fuente: Erensia Sefardi – 46 Benson Place, Fairfield, Ct. 06824 U.S.A.
Fax. 203-256-8819
