De la meza de Medi: Rabi Shelomo Iben Gabirol por Medi Cohen-Malki

Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.

Ver todos los artículos de esta sección >>

En la istoira literaria de la epoka medieval de los djidios de Espanya, no topamos un poeta i filosofo tan uniko en sus ovras de eskritura i en su vida tan kurta i tan pasionada.

Su mundo enterior i eksterior, fue tan arrazgado,tan variado i tan oposto. su ovra, es muy doliente, de la una parte, i de la otra, muy delikada.

De vezes ,el aparese komo una persona entelijente, sofistikada i rasionala i, de vezes, su alma esta bolando entre las fantazmas, la metaforika i el arte de la poezia araba komo un artizan ke es kapache de distingir entre las kolores i los nuanses de la vida.

Sus deskripsiones de natura son tan finas,i los sentimientos de amor i de l’amistad aparesen tan finos.

El s’adresa , direktamente, a sus amigos kon amori kon entuziazmo ma, tambien, de vezes, kon reproches. Este es un eroizmo liriko.

La trajedia de su vida, se ekspresa en munchas de sus poezias. El protesta kontra la inyoransa i la estupides, i, kontra las sirkunstansias amargas de su vida, tan doloroza i tan trajika.

Sus ovras ekspresan el mal i la dolor de su destino i de su deskontentes de sus amigos. El los prezenta sin barieras i sin espantarse.

De otra parte, el es muy shalorozo: sus piyutin son yenos de espiritualizmo i de rogos al Dio, entendiendo su lugar en este mundo.

Penso ke, aki se revela un otro aspekto de su personalidad tan espantada i yena de temor i de sufransa.

El nasio en Malaga, en el 1021 o en el 1022, i dizen, ke murio a la edad de 37 aniyos, o, un poko antes. De ayi, el estava errando de lugar en lugar.

Una de las estasiones de su vida, fue Saragosa, ke de eya, el fue ekspulsado, probablemente, despues de eskrivir unas envestigasiones filosofokas, ke fueron enterpretadas komo una protesta kontra la relijion.

En Saragoa, el konosio al vezir Yekutiel Iben Hasan, ke le fue un amigo de alma i de korason, ma, ke malorozamente, fue eksekutido, i ke, sovre el, fue eskrita su famoza endecha;»Mira el sol» ke es una ekspresion de dolor kon la partisipasion de la natura.

Ay ke apuntar, ke en su vida, Iben Gabirol, le eskrivio salmos de admirasion i de amistad. El se burlava de las djentes de la sivdad, i eyos no le pardonaron, este komportamiento kavzo un gran odio de sus parte.

Amargo i doliente, el kita a Saragosa i pasa a Granada: la sivdad de las gran batalyas i gerras. Esta sivdad, yena de akshitekturas maraviozas i de fontanas, i de otra parte, yena de intrigas i de komplotos.

Ayi, el konose a Rabi Shemuel Hanagid, i kon el ,tambien el esta diskutiendo i kritikando sus poezias.

Shemuel Hanagid, eskrivio sovre los pasatiempos, sovre el vino, sovre la gerra. Esto, de manera tan biva i tan kolorida .

Amargo i desepsionedo, el kita a Granada. El no kere mas bivir en Espanya i esta aziendo su kamino a Valensia, para topar un ayudo, afin de yegara la Tiera Santa.

Ma, malorozamente, el topa su muerte en la kosta de la sivdad.

Su vida, fue muy trajika i su alma fue torturada: el devinio guerfano en su chikes, bivio en soledad, en apreto, kon hazinuras i kon el menester de apoyarse de la karidad de unos filantropos.

Munchas vezes ,el se peleyava kon sus amigos o kon su vizindado. El fue un ombre de lucha enterior i eksterior.

Esta fue la vida de un gran ombre, de vida de sufransa i de dolor, ke desho sus ovras immortalas para muestro patrimomio.