eSefarad Noticias del Mundo Sefaradi
La Fondasyon Yeushua Salti, 15 anyos antes, kreo al seno de la Universitad Bar Ilan de Tel Aviv un sentro de estudios para la kultura sefarad i su lingua yamado Sentro Naime i Yeushua Salti. Kon el tiempo este sentro se dezvelopo de tala manera ke no solo fue famozo en Israel ma en todas las partes del mundo onde egziste un lavoro semejante. El sentro fin oy en dia formo 14 doktores i una larga lista de estudiantes en M.A., siertos de los kualos kontinuaron a azer partida del kadro akademiko de esta institusion.
Visto ke el entereso sovre los estudyos interdisiplinaryos en los 3 dalkavos anyos pujo muncho, la Fondasyon Yeushua Salti tomo la dechizyon juntos kon la administrasyon de la Universitad Bar Ilan de dezvelopar este sentro en “Instituto” el kual fue establisido en su seno ma kon un karakter endependiente. El instituto fue yamado “Instituto Salti para los estudios del judeo espanyol (ladino)’’ Se kreyo sovre esto una mueva administrasyon ancha, debasho de la otoridad del prof. Shmuel Refael.
El Instituto okupa una ala al seno de la Fakultad de Estudyos Djudios i se espera en los anyos vinideros, si se topa un sponsor ke ayudara a fraguar su edifisyo sovre el terreno ofresido por la universitad Bar Ilan, al enterno de su kampus, ke reglara la kestyon del espasyo estrecho aktual.. En triplando su budjeto el instituto oy en dia no resive dingun ayudo del ministaryo de edukasyon, i todos los gastos son finansados por la Fondasyon Yeushua Salti i por unos kuantos donatores.
Sea en Israel sea en el mundo esta institusyon es unika i se espera kon el tempo eya kontinuara a dezveloparse visto ke el entereso verso eya del publiko en Israel puja mas de dia en dia. Muevos projektos estan programados para mirar a ke estudiantes del ajeno puederan vinir a estudiar en el Instituto. Bekas seran rezervadas en el anyo vinidero para los estudiantes del estranjero. La konosensya de la lingua en despartes de la edad ke no deve depasar los 45 anyos es egzijado para ser kandidado .
El anyo pasado la biblioteka del Instituto se enrikesyo de serka 500 livros donados por el Prof. Isaac Jack Levy de Atlanta, los Estados Unidos i mas unos kuantos por la sinyora Jerushalmi la bivda del Prof. Isaac Jerushalmi( z”l.). Entre eyos se topan livros istorikos i kaji ralos en ladino, koza ke la enrikese. Ansi la biblioteka este en kamino de ser una de la prinsipalas en el kampo del sefaradizmo i de su lingua en Israel. Eya es i sera avierta al publiko para sus investigasyones sovre la istoria, la lingua, el folklor i mas.
El anyo akademiko 2019-2020 , komo anyo eksepsyonal, sera rezervado por lo mas, para la formasyon de estudiantes nuevos kandidatos al M.A i Ph.D sovre el ladino i su kultura. La Universitad oganyo organizo una kampanya a este sujeto i los aplikantes son bastante nombrozos. Eyos son interesados a estudiar para aparejar sus tesis en el kampo interdisiplinaryo del ladino, lo ke kere dizir literatura,folklor,istoria, kultura linguistika i mas. El buto del Instituto es de formar en los anyos vinideros al menos 10 estudiantes de M.A i Ph.D de los kualos siertos seran adjuntados al ekipo docente del instituto. Los muevos estudiantes ke seran eskojidos seran dirijidos en sus lavoros por la Prof. Ora Schwartzwald, el Prof. Shmuel Refael, el Dr. Dov Kohen, la Dra.Nivi Gomel, la Dra.Susy Gruss i la Dra. Silviana Gesser. Sera djusto de mensyonar ke el ekipo akademiko del Instituto es el mas grande sovre los estudios sefaradis entre todas las universitades israelianas.
Ademas durante el muevo anyo akademiko se van avrirse muevos korsos sovre la literatura en ladino, komo los muevos del Dr. Dov Kohen sovre las ovras literarias del sinyor Saadi Halevy, sovre las revistas umoristikas en djudeo espanyol i sovre las eskritas en solitreo i muncho mas. Los korsos de lingua seran dirijidos por la Dra. Nivi Gomel i la Dra. Ilil Baum. La Dra. Nivi Gomel ke tuvo una formasyon akademika unika para ensenyar el ladino, es una maestra bastante renomada en Israel. Kada anyo sus klasas son yenas i este anyo el kontinjente este para inchirse. Eya publiko en juntos kon el Prof. Shmuel Refael un manual para la enseniensa de la lingua. La Dra Silviana Gesser tiendra 2 korsos sovre la Espanya i la dispora de los ladino avlantes. En 2021 se repetara el korso sovre la istoria de los djudios de Gresia, ke fue por la primera vez dado el anyo pasado onde 20 elevos resivieron sus diplomas. Este korso fue apresyado por la mayoriya de los ke organizan viajes en Gresia.
Entonses se aspera ke esta anyada akademika sera el impesijo de una mueva forma interesante de edukasyon ke se ofresera a los estudiantes mansevos por lo mas desendientes de los olim en jeneral viniendo sovre todo de las komunidades sefaradis.
Selim Salti
Fuente: BÜLTEN de los turcanos de Israel – turkisrael.org.il
