eSefarad Noticias del Mundo Sefaradi
La kuzina sefardí i sus platikos. Ofresemos rechetas de kumidas savuridas para fiestas o reuniones kon la famyia.
En este programa las rechetas de tradisión sefardí ke partajamos son «Guevos kon espinaka», i un riko «Arros kon kaldo de tomat» i ansimezmo una dulsuria muy afamada «Baklavá». Entre los kantes eskojimos algunos gastronómikos komo el kante de bodas «Day de senar» en la boz de Marlène Samoun i el kante «Una muchacha en Selanika» en la interpretasión de Paco Díez i Raúl Olivar. Kurunamos el programa dedikado a la kuzina kon el kante «Merenjenas».
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
