eSefarad Noticias del Mundo Sefaradi
Ver todos los artículos de esta sección >>
Personas Diferentes
Sin ser engrandesidos en una vida fina,
Es una borraches de fama ke los domina.
Estas personas se sienten las más poderosas,
Sin pueder ser a sus entornos provechozas.
Se ven komo bivyendo en un sielo de sensyas,
Miran a dar sonrizas falsas i solo pasensyas.
Sus korasones en las bolsas, sus avlas rikas
Esperan alavasyones son de echas chikas.
Se van en deshando memoryas insinyifikadas
Manchan el humanismo kon echas artistadas.
Otros enkarnados de profeta en kuerpo d’ombres,
Se konosen de sus vistas sin dizir sus nombres.
Saven, ke la vida es un soplo, un enstante,
Son yenos de kerensya, de buendades bastante.
Personas dekoradas kon la sensya de savyos,
Sus humanismos en sus sangres i en sus lavyos.
Avrin kon kerensya los brazos a malorozos
Son más serka de los proves ke los poderozos.
Djente ke deshan al mundo briyantes patadas
Los ekos de sus echas no serán amatadas.
Haim Vitali Sadacca
Florida
—————————————————————————————————————————-
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía. Disfrutaremos en esta sección la habilidad de Haim como poeta y su dominio de la lengua ladina.
