Poemas de Haim Vitali Sadacca: "LETRA DE UN AMOROSO ABANDONADO” i GRASYAS AL KREADOR

 Haim Vitali Sadacca, que escribió y publicó poesía en turco en sus años jóvenes, ahora compone sólo la poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina. 

«LETRA DE UN AMOROSO ABANDONADO”

 
Si un dia veras tus kaveyos blankos
Te rekordaras los bezos en los bankos,
En las tadradas de un sol eskondido
El sielo techo, los bankos komo nido.
 
Tus ojos lagrimosos en tus abrasos,
Tu kara en mi ombro,tu en mis brasos
Aziamos los planos por el futuro
Para mi era un suenyo…te lo djuro.
 
Tus serkantes te izyeron alesharte
Dizyendo ke yo no puediya darte
Akel gozo ke vites en tu famiya,
No kijeron k’entres a la vida miya.
 
Yo posedava rikesa diferente
Ninguno me apresyo, mismo mi djente.
Ke se aze? No se kambya el destino
Kedaras siempre en mi sangre, en mi tino.
 
Un dia te rekordaras d’este amante
Ke t’apresyava komo un diamante.
Yo ke era tu ombre el mas kerido
Lo deshates kon su korason ferido.
 
 
Haim Vitali Sadacca
Montreal.

«GRASYAS AL KREADOR»

Dio mio, a nuestra vida tu sos el ke gravates,
Plaseres enormes i deseos ke mos regalates
En kreando la mujer kon  esplendor d’una estreya
Ke echisa a los ombres kon las dulsuras de eya.
Su alma transparante komo akel vaso vazio
Inchirlo d’amor, no se si sera un pekado mio.
Eya me dyo su sonrisa komo ofreser una rosa
Este regalo divino rendyo mi vida horosa…
Es ke fue mi kulpa si las dos almas se miraron
Si akeas miradas en sekreto se abrasaron?
Los sentidos de karinyo en la vida ke mos dates
Alumbrates nuestra bivyenta i la dekorates.
Sos el duenyo de nuestros gozos i korasones
Tu nombre bendicho esta en nuestras orasyones.

Haim Vitali Sadacca
Montreal