eSefarad Noticias del Mundo Sefaradi
El otro dia estava delantre el espejo aziendo un desen de mi kara. Salio bueno komo desen, ma tenia el aire de una persona triste i aedada. Pensi entonses de eskrivir una poesia kontando lo ke veyia ayi. Lo ize en Ingles. El desen no se komo lo puedo embiarlo. Ma la poesia ya puedo.
KE ES ESTA MIRADA TRISTE EN TU KARA?
Ke es esta mirada triste en tu kara?
Falta ayi la alegria i la grasia
Ke es ke te preokupa en tus 76 anyos?
Lo ke se ve en tu kara es un sierto espanto
Era aier solamente ke eras un ninyo
Kon esperansas i viziones de un futuro bueno
Tus ojos miravan a kada muchacha ke pasava
Esperando gozar de romanses era tu plano.
El futuro guadrava grandes promesas
Kon el deseo de aventuras korriendo en tus venas
Esperavan ke la vida dure kaji por siempre
En teniendo delantre de ti, tantos anyos de vida
Estas esperansas no se realizaron
Ver los anyos pasar tan presto te sorprendio
La vejez te kito tus fuersas, aparensia i mansevez
I te dates kuento ke la vida no era un balo en realidad.
Partieron de ti todo lo ke te dava plazer i gusto,
Ya no puedes esperar tanto de lo ke keda en tus manos.
Te toparas sin duda eskayendo mas i mas kada dia
Goza de lo ke puedes te diran todos.
KITA A ESTE AIRE TRISTE DE TU KARA
AKSEPTA LA REALIDAD DE LA VIDA
TODOS TENEMOS KE PASAR POR AYI
Eskrito por
El Kapitan D’Estambol
Shimon Geron, Sydney
