Poema: EL LIRISMO SE VA MURIR de Odmar Braga

EL LIRISMO SE VA MURIR 

Para Haim Vitali Sadacca
Poeta ermano de mi Sefarad.

Basho mantones de estreyas
en una notche de luna yena
para dezespero de los amantes
i de kimeras atudridas
de turbasión se va a murir
en la garganta de una metáfora
entre los brasos de un poema
el lirizmo se va a murir…
se va a murir… se va a murir…
 
 
Arrepozando gritos al ayre
por el kesharse de una roza
gemirán todas las poezias
soyosos de eskarinyos
en pétalos de gardenias
el lirismo se va a murir…
Kon klaros ojos kafé
i inkieta kara marfil
de silensio se va a murir…
el lirismo se va a murir…
se va a murir… se va a murir…
 
 
El sielo vestindo preto
de apretado asolombrórse
i estropiórse en el djardín
por los motivos de las flores
basho mantones de estreyas
en una notche de luna yena
en la garganta de una metáfora
en los brasos de un poema
el lirizmo se va a murir…
se va a murir… se va a murir…
 
 
Remordiendo sinekdokes i katakrezes
entre los grunyidos de los gerundios
a eskupir los murmuyos inkoherentes
de las prepozisiones presipitadas
ke alfilan los dias kon una lansa
enlokesida de inartikulados byervos
i una monosilabika nostaljia
kuya nuvloza sinyifikasion
de ezmoviente yanto arraska
de el piskueso de una kandela
sus esfuenyos maz sekretos
el lirizmo se va a murir…
se va a murir… se va a murir…
 
 
En el yorikeo inkieto de las rozas
gemirán en silensio todos los sinyos
i sangrarán todos los korasones
el lirizmo se va a murir…
sin konsolasion se va a murir…
basho mantones de estreyas
en una notche de luna yena
en la garganta de una metáfora
en los brasos de un poema
el lirizmo se va a murir…
se va murir… se va murir…
ma nunka se va murir…

Odmar Braga .·.