Poema: Asta kuando?! de Isak Altarats

Isak Altarats servio en la komunidad djudia de Saray komo el hazan-bashi del Kal Grande. Su kansion “Asta kuando” fue publikada en el “Jevrejski glas” (“La boz djudia” – un semanal djudio lokal) en el 28 de Avril 1933.

Asta kuando?! 

I

Asta kuando Judio deskonsolado,
Iras kon la kavesa abokada,
Penseriozo, triste i amulado,
En tiniendo la alma arankada,
I el korason despedasado,
De un muy dolorioso pasado,
Todo en temblando i kaminando?
Diz o puevlo de Israel! Asta kuando?

II

Asta kuando, o puevlo maltratado,
Menospresiado de toda la jente,
Presigido, yagado i matado,
Kon la senyal de Kayin en la frente,
Koreras sovre arenas i nieves,
Suportando Hitleris, boykotis Kishinieves,
Sin reflo, desmayado i tresudando?
Diz, o puevlo de Israel! Asta kuando?

III

Asta kuando vierteras kon amargura,
Deluvios de tristes i doloriosos yoros,
I desharas korer de tu pechadura,
Sangre… sangre de inosentes a choros,
Oy en Alemania, ayer en Espania i Rusia,
Ah, sangre de la povre nasion judia,
Ke tiranos aman estar vaziando,
No te va dueler ainda? Asta kuando?

IV

Asta kuando veras kon sagre fria,
El brio i el gozo de las nasiones,
Eyos saltan trisalen de alegria,
I riyen en sus fiestas i distraksions,
Mientres ke tu tenes de dar un chiko salto,
Te espantas de avlar un poko mas alto,
Indemas kuando Pesah (alilat-adam) esta aserkando,
Ah, ke miserable vida! – I asta kuando?

V

Asta kuando akel deseo ardiente,
De tornar a tu antigua patria,
Inspirado kon la avla elokuente,
de los grandes Profetas de la Biblia,
I de los dulses Poetas del kativerio,
Sera tu konsolante uniku penserio,
I en los Templos lo iras deklarando,
Kantes melankolikos kantando, i asta kuando?

VI

Asta kuando restar indiferente,
Al despertamiento del povre Judaismo,
I komo ajeno mirar de enfrente,
Los esfuersos ke aze el Tsionismo,
Por el renassimiento de la triste nasion,
Ke espera una barka de salvasion,
Para los ke de vente siglos estan nadando,
O, ke mar tempestosa! Asta kuando?

VII

Asta kuando esta indolensia?
Asta kuando esta apatia dura?
Asta kuando esta mala egsistensia?
Asta kuando esta vida eskura?
Asta kuando este amargo estado?
Asta kuando este sueno pezgado?
Asta kuando estaras todo ronkando,
Asta kuando puevlo de Israel! Asta kuando?

———————————————-
Rengrasiamos al Prof. Eliezer Papo por darmos a konoser este poema.
———————————————-