eSefarad Noticias del Mundo Sefaradi
Los organos del puerpo empesaron entre eyos eskojer i deklarar, kien es el rey del puerpo.
Salto el korason i kon inyervos anunsio: yo so el ke da vida, sin mi ay solo muerte, de la importansia ke tengo esto konternado kon kustiyas.
Disho la sangre, i sin mi no ay vida.
El estomago grito, sin kumida , no ay vida.
No acheto disho el garon, sin mi no tienes nada.
Estash yerrados disheron los rinyones, la mersa, i el fegado, kon ayudo de la fiel i los intestinos, sin mozotros no ay valor de la kumida.
Devesh de entender disho el bofe, sin mi no ay aver, i sin aver no tenesh el oksijen, ke es la madre de la egsistensia.
Ya me insultatesh, marmuleo el ojo, sin mi ay kayidas i trompesos.
Es verdad deklaro la oreja, sin mozotros, no ay ni ver ni sintir.
I yo se valutozo, disho el sieso, ama no se avla de esto.
Ya mi emfastyi de oyirvos, disho el umbligo, sin mi no se puede venir al mundo.
Devesh de imajinar kualo es sin kolona vertebral, el organo el mas largo, vos do la fleksabilidad, de abokar i enderechar, sin mi sosh un punyado de organos, separados, i isolados.
Avlash todos los internales, ama mozotros entenemos el puerpo, semos los piezes, las manos, el jinoyo i la pierna, el kovdo, i el karkanyal, la tripa kon la espalda i el pecho kon ayudo de los muskulos.
De la ermozura no pensash, saltaron las sejas, i las pistanyas, los kaveos, kon la barva i el mustacho.
I yo se nada? demando la nariz, yo vos traigo la golor de la natura, de las flores,i la luvia, los parfumes,i las ondas de la mar.
Enganyosa sos, arespondiola kavesa, tu mos trayes el guesmo de las fabrikas kon el fumo preto, el estierko i kurtijo de atras.
No tenesh verguensia se entermityo el meoyo, sin mi no ay nada, yo aremaso todo i entiendo, vos do los ordenes i vos amostro las direksiones en la vida: sin mi sosh un pedaso de materyal, yo so el rey. Es ansina ke me metieron en el lugar el mas alto, komo merese el rey.
El pankreas, kon forma modesta, les disho a todos, no me emporta ni del rey, ni de la importansia de kada uno. Es obligado, ke funksionemos en kolaborasion, i mos enreziemos kontra las hazinuras i atakos ke kieren kavzar danyo al puerpo.
Este modo deseo para el puevlo, ke aiga unidad i kolaborasion, respekto i honor entre todas las partes, sintir a los ke estan enfrente, eskuchar otras opinyones, todo kon pasensia.
Puevlo ke es aunado, es la mijor koza kontra los enemigos ke mos atakan.
Nissim Ashkenazi
Kiryat Motskin
Israel
————————————
Fuente: Ladinokomunita
