eSefarad Noticias del Mundo Sefaradi
El Rey Aleksandros Mokdon disho a los viejos de la sivdad: kero irme a la sivdad de Afrika. Le disheron: no es posivle ke puedas ir syendo ke ay en el kamino unas muntanyas eskuras. Disho a eyos: sin ir yo ayi no puede ser, i no demando de vozotros otro ke me digash ke modo sera mi rijo a ke pueda ir. Disheron a el: toma unos kuantos aznos grandes de los de Mitzrayim (Ejipto/Ayifto) ke saven kaminar byen aleskuro i unos kuantos manojos de kuedras, i kuando estes serka de las muntanyas eskuras ataras un kavo en el lugar ke konpesa a eskureserse i resto de la kuedra tendras en tu mano i no la soltes para ke kuando tornes te vayas travando en las kuedras i no piedras el kamino.
I ansi se fue por akeyos lugares i entro en una sivdad de mujeres ke no aviya ombre ayi i kijo odrenar batalya kon eyas. Le disheron: no azes byen de gerrear kon mozotros, ke si mos matas dinguna fama tyenes, lo ke se dize es ke matates mujeres, ma si mozotros matamos a ti seras menospresyado en boka del mundo, dizyendo: Un rey komo Aleksandros, su fin fue matado por mano de mujeres. Disho a eyas: Traeme pan. Le trusheron un pan de oro en meza de oro. Disho el: Esto es komida de djente en este lugar? Eyas le disheron: No uzan aki a komer pan de oro, ma syendo te vemos venir a tal lugar leshos, mos maraviyamos muncho dizyendo: Ke no tenias ke komer en tu sivdad ke te aleshastes de tu reynado a venir aki? I syendo ansi, entendimos ke tu venida fue para kojer dinero i por esto te trushimos pan de oro. Kuando salyo de akeya sivdad eskrivyo en la puerta: Yo, Aleksandros Mokdon, fui loko asta ke vini en esta sivdad de mujeres i aki deprendi sensya.
Transliterado i editado de la versyon de Izmir 1864, en letra rashi de Fredy Cauich Valerio de Sivdad de Mexico.
Fuente: Ladinokomunita
