eSefarad Noticias del Mundo Sefaradi
Ver todos los artículos de esta sección
Murir doz vezes (1)
por Albert Israel
Manek, Vill i Dadi nasyeron en los empesijos del sieglo 20. Manek en Polanya, Vill i Dadi en Viena de Austria. Manek emigro de Polanya a Austria i los konosyo a Vill i Dadi. Los tres eran djudios i amigos Buenos. Vill i Dadi moravan en el mizmo apartamento i meldavan en la mizma klasa de la mizma eskola. En los empesijos de los anyos 30, del sieglo 20, Vill emigro a Suiza, Dadi i su famiya emigraron a Israel, Manek kedo en Viena.
Yo me yamo Yair Lev. Nasi en 1959 i moro en Tel Aviv. So rejisor de filmos i profesor de sinema. En 1996 aresivi el premyo del ministro de kultura sovre el «Arte de sinema». Fin agora meti en ekranes munchos filmos, kurtos i largos. Entre eyos: «Hugo», «Hugo 2», «Los eskarinyos de Maya Gordon», «El sujeto: Uri Avneri» i mas…
Una demanyana aresivi un telefon de mi madre. De la boz se entendia ke estava muy emosyonada. Me disho: «Yair, no demandes… Un avukato, yamado Eran Wagner, me telefono i me dyo dos novedades. La una buena i la otra no tanto buena. Kuala ke te lo diga emprimero?». Le dishe «La buena». «Bueno, el haber bueno es ke una tanti leshana de vanda de mi padre, ke se yama Dita, le desho a mi padre por erensya una kaza en London. Esta kaza vale mas de un milyon i medyo! Komo ya saves, mi padre esta en gan eden. Ansi ke esta erensya me kaye a mi…». «I el haber negro?» le demandi. «El haber negro es ke el avukato tyene en la mano dos datas de muerte de mi padre. I yo no va pueder tomar esta erensya si este problem no se va rezolver …». «Bueno» le dishe «esto no es problem grande. Lo rezolvamoz…».
No voz puedesh imajinar ke karar (kuanto) me yerri!
Entrimoz a la ofisina del avokato i le amostrimoz el sertifikato de muerte ke teniyamoz en kaza. Aya se esta vyendo ke mi nono, Ernst (Dadi) Bechinski, nasyo en Viena en el 12/7/1902 a las 9:50 de la demanyana i muryo en Israel en 20/11/1969. Kontra esto, el avokato moz amostro sertifikato de muerte mandado de Austria. Aya se esta vyendo ke Ernst (Dadi) Bechinski, ke nasyo en Viena en el 12/7/1902 a las 9:50 de la demanyana, muryo en Innsbruck en 31/5/1987(???).
Salimoz de aya kon los mokos enkolgando… Kualo kale azer??
Viyaji a Innsbruck. La prezidenta de komunita djudia en Innsbruck, Dr. Esther Fritsch, me aresivyo kon muncho plazer:
- Ernst Bechinski? Siguro ke lo konosko! Era el prezidente de las kumunitas djudias en las rijyones Innsbruck i Bregenz, durante los anyos 1976-1986.
- Ma el muryo en 1969 en Israel…
- No kerido! El bivyo aki, era muestro prezidente i se muryo en 1987. Esta enterrado aki! Na mira, aki en la pared tenemoz las fotografiyas de todos los pezidentes. Este es Ernst… No, no avlava otra lingua ke solo el alman… Nunka avlo por su famiya… No se si era kazado… Nunka moz konto de su vida privada i por su pasado, durante la gerra…
La verdad es ke ya ay semejansa entre las fotos de mi nono i la foto ke esta enkolgada en la pared…
En el depo de la komunita en Innsbruck empesaron a bushkar kashas i kutis vyejos. Si! Ya ay aki un anvelop kon dokumentos. Dingunoz no lo avriyeron este anvelop fin a oy. Ay aryentro un sertifikato de Keren Kayemet Le Israel ke «Ernst planto 20 arvoles en Israel»… Ay fotos de Ernst kon diferentes mujeres. Detras de una foto esta eskrivyendo «Ilse». Ken es Ilse?? Kualo es este dokumento? Sertifikato de kazamyento del anyo 1946 en Zagreb. Ernst se kazo kon Ilse Foke en Zagreb… Kristyana… Dingunoz en la komunitad no savian ke era kazado…
A kontinuar…
Albert Israel
