Avladino kon Albert Israel en Yerushalayim: Los dos vizinos…

Ver todos los artículos de esta sección 

Los dos vizinos…
por Albert Israel

Moshon i Salamon eran dos amigos buenos. Moravan en el mizmo apartamento. Moshon morava en «Rez de chaussée» i Salamon enriva de Moshon, en el primer etaj. Los dos eran borrachones grandes. Kada tadre se ivan endjuntos a la meyana i tornavan de aya en medyo de la noche, emborrachados tinta…

Una noche yene tornaron a kaza borrachos, meneyandosen enteros. Salamon estava mas borracho, le disho a Moshon: «Asi bivas tu, esta noche no tengo fuersa de suvir solo las eskaleras, ayudame.» I moshon, komo amigo bueno, lo tomo a Salamon al ombro, lo suvyo las eskaleras, le kito la yave de la aldikera, avriyo la puerta, lo tomo a la kamareta de echar, avriyo la kuvyerta de la kama i lo echo a durmir.

El ke abasha abasho, kualo ven sus ojos?? Salamon esta abasho!! «Atyo» le demando «no es ke te tomi ariva??»

«Moshon, una ves en el anyo te demandi un plazer i esto no lo saves azer??»

Bueno, disho Moshon de si para si. Parese ke esto un poko borracho… Izo demuevo los mizmos pasos, lo suvyo a Salamon ariva, lo echo i torno abasho. El ke torna, kualo ve? Salamon esta abasho!!! Va salir loko!!! Esta sulando!! Le demanda a Salamon:

• Antes sinko puntos no es ke te tomi al ombro miyo?
• Si!!
• Te suvi ariva?
• Si!!
• Tomi la yave de aldikera tuya i avri la puerta?
• Si!!
• Te tomi a la kamareta de echar?
• Si!!
• Avri la kuvyerta de la kama i te echi a durmir?

No!!! avrites la ventana i me echates abasho!!!

Albert Israel