eSefarad Noticias del Mundo Sefaradi
Ver todos los artículos de esta sección
No por sedaka!! ni por shaka!!
por Albert Israel
Komo ya savesh, oy el parir es muy enreglado. Unos kuantos mezes antes de la paridura ya moz enrejistramoz a uno de los ospitales, serka de kaza. Kuando vyene el tyempo moz vamoz al dicho ospital. Moz meten a una kamareta «De luks» (porke el governo les paga muy bueno para kada paridura). La paridura pasa en «Kamareta de Operasyones» kon todos los enstrumentos nesesaryos i modernos. La madre presa, el padre detyene la mano i la komadre ke ya es komo doktora (el doktor se yama a la kamareta solo si ay komplikasyones) pare la kriatura. Le korta el kordon del umbligo, la lava, la emburuja i mo la da en la mano. Dospues de dos dias, ya moz echan a la kaye!! En la salida moz dan los dokumentos kon el numero de identidad de la kriatura. En akel momento la kriatura ya esta enrejistrada en el ministro de interior, ya se save kuando nasyo, ken es su padre i ken es su madre…
Todo esta bueno solo….
Akeyos tyempos las pariduras se aziyan en kaza. kuando la komadre diziya: «Trayme agua keynte..» se saviya ke la paridura ya empeso. El marido saliya afuera i la komadre aziya las mizmas aksyones ke mensyonimoz ariva, solamente kon una diferensya: Ofisyalmente la kriatura «no egzistiya» fin a ke sus paryentes se ivan a rejistrarla. Esto era un avantaj muy grande. Si una keriya adopter kriyatura de otra, el echo era muy kolay (fasil). La otra se iva i la rejistrava komo su propya kriyatura. No komo oy, ke te kitan la alma fin a ke te permeten a adopter kriatura.
Mi granpapa se fuyo de Salonik durante la primera gerra mondial i entro a Turkiya, kachak (ilegalmente). Se kazo dospues de ocho anyos (kazamyento de los djudyos) i le nasyo un ijiko (mi padre). Mi padre se izo de 7 anyos i kalia meterlo a la eskola. Solo en akel momento (dospues de kinze anyos) se enrejistraron toda la famiya ofisyalmente. Naturalmente kon dar rushvet.
El tiyo de mi madre vino a Israel antes 70 anyos. Merko un verjel en Beer Yakov i era de los primeros ke se eresentaron en esta sivdad. Se kazo i su mujer le paryo 5 ijos. Su kunyada (la ermana de su mujer) no estava puedyendo parir. Le rogo a su ermana: «Pare otro un ijiko para mi». Este modo, la mujer del tiyo paryo el sejen ijo i se lo dyo a su ermana. Pasaron anyos, el ijiko ke se engrandesyo i se ambezo la istorya, vino a su propya madre i le disho: «Mama, teniyas 6 ijos. Deke eskojites de darme davka a mi?».
Porke me akodri de esto todo? Porke meldi lo ke eskrivyo Sharope Blanko de su pasaje, kon su dulse eskriturya. Si mi madre (ke este en gan eden) lo meldava esto iva dizir: «No por sedaka!! Ni por shaka!!!»
Vo lo esto kopyando este pasaje aki, de la pluma de Sharope Blanko, ke voz riyash un poko:
«Mi tiyo, en un primer kazamiento, teniya una mujer ermeniya. Una kuzendera alavada ke kuziya solamente para los grandes artistos i a las dammas rikinyonas de Turkiya. Kada nada se iva ande su ermana en Paris para trayer ropas i modeles muevos. Un diya el guerko no teniya ke azer! Mi tiyo me izo fitil bueno, bueno (me incho la kavesa) i este modo pensi ke va ser interesante de ver la kara de mi novyo, tan kerido, si le digo ke yo no so la ija de mi madre i de mi padre ke so la ija de mi tiyo kon la ermeniya!!…
Estavamos asentados amorozamente en una patiseriya de Gumushsuyu, en frente del Park Otel, en una guertizika chikitika chikitika, muy sempatika. Lo miri derecho en sus ojikos bleu i kon la mas dulse de mis sonrizas le dishe avagarito, si su amor por mi iva trokar de kolor si le diziya una verdad (!) ensima de mi… Se le emblankesyo la kara i me kedo mirando… Yo estava muy kontente de mis talentos de aktrisa… Ize mi kara muy seryoza i en un soplo le dishe ke yo so la ija de mi tiyo kon la ermeniya i ke eyos me dieron a mis paryentes porke mis paryentes no puediyan tener kreaturas i ke mi tiyo estava akel tiyempo para kitarse de su mujer!!
Mil guerkos del gehinnam!! Madre miya bendicha!! Por todos los lonsos de la Alaska i de Kazakistan!! Katastrofa de kolor zurzuvi! Dezgrasya de las dezgrasyas…
Mis talentos de aktrisa parese ke fueron mas de perfekto!!! Tuvimos una dospues-de-midi komo los filmos d’espanto! Disho ke es muy importante para el i ke tyene de pensar de espartirse!!!
Di-o miyo! Ke ize yo! Troki pishin la plaka! Ma imposivle era de konvenserlo! No sirvyo a nada de dizir ke esto todo lo enventi para djugar.
(teniya echo otruna ves ansina de bovedad para una koza muy similar…Para ke seya interesante…Fue demazyado interesante !!!!).
Kurto, vinimos a mi kaza i solo dospues ke mi mamita lo konvensyo, es ke se kreyo ke esto era solo un djugo… Loka, loka de atar, era yo! Kuanto mi madre se inyervo kon mi dospues de esta historya?? No demandesh… No es mi kulpa… Si todo esta bien, a mi me empesa a vinir ideyas tuguertas! Kale ke se aga todo siniza para meter pimienta i sal en mis relasyones… Yo lo ago por shakas kon innosensya i sale… El Di-o ke moz guadre!!!»
Kualo dishimoz? No por sedaka!! Ni por shaka!!!
Aki tenemoz un filmiko chiko en turko. No ay menester de entender la lingua:
Albert Israel
