eSefarad Noticias del Mundo Sefaradi
Ver todos los artículos de esta sección
Eli Kohen, el espiyon muestro en Siria (1)
por Albert Israel
Eli Kohen nasyo en 6/12/1924 en aleksandria, Ejipto. Su padre Shaul i su madre Sofya eran de famiyas sefaradias ke emigraron a Alksandria de Halep, Siria. Eran 8 ermanos i ermanas. En kaza avlavan el ladino, el franses, el arabo i el ebreo. Eli se engrandesyo en un atmosfer tsiyonisto. En los anyos 1944 meldo injiniería en la universita «Faruk» de de aleksandria, en mizmo tyempo era Mason i miembro del muvimyento tsionisto. En 1954 alkilo un apartamento i lo metyo a la dispozisyon de los miembros de la operasyon, ke kon tyempo fue yamada «El Negosyo Malo». Dospues ke se aferraron los miembros del «El Negosyo Malo» los ejipsyanos aferraron a Eli Kohen tambien, ma Eli reusho a konvenserlos ke es inosente i lo liberaron. En 1957 emigro a Israel i se auno kon su famia ke vinyeron un anyo antes i bivian en la sivdad Bat-Yam. En primero no lo kijyeron tomar a los servisyos de intelijensya porke era konosido a la polisiya de Ejipto. Empeso a lavorar en el «Mashbir Merkazi», en la seksyon de kontabilite. Mas dospues lo tomaron al servisyo de intelijensya para ke traduize gazetas de arabo. En 1959 se kazo kon Nadia ke era gardmalad i emigrante mueva de Irak (La ermana del autor Sami Mihael). Les nasyeron tres kriaturas, Shay Irit i Sofi. A la fin, en 1960 Eli se izo soldado en la «Fuersa de Intelijensya» de la armada Israelyana (En 1964 La responsabilita va pasar a Mosad i Eli va ser soldado del Mosad).
En 1961 paso Eli a Arjentina kon identidad falsa. Kemal Amin sabet, komersante Libanezo, ekportador de tekstil, ijo de djenitores sirianos, patrioto siriano, riko i hovarda (jenerozo), eksilado de Beirut. Eli se aresento en el kartye de los arabos en Buenos Ayres i empeso a fraguar relasyones buenas i amistozas kon arabos, salidos de Siria. Entre eyos Amin el Hafiz ke era atashe militar Siriano en Arjentina. (En 1963 Amin se va azer el prezidente de Siria)
En enero 1962 vino Eli a Israel i tomo el orden de «tornar» a Siria. Se metyo en kamino kon un vapor ke partyo de Genua (Italia) a Beirut (Libano), enkargado kon «Radyo Transmisor» ke lo va uzar para transmisar informasyones a Israel i eksplosivo guadrado aryentro de un sabon «Yardley» para pueder suisidarse en momento de menester. En el Vapor se enkontro kon un komersante, Magd Sheih El Ard, siriano de orijin, ombre del mundo grande, avla el alman perfektamente, ke i el tambien estava tornando a Siria dospues de 16 anyos an Almanya. El Ard le propozo a Eli a tomarlo de Beirut a Damasko kon su otomobil, ke estava en el vapor. Eli aksepto. Dospues ke arivaron a Beirut i se repozaron un dia, salyeron al kamino kon el otomobil de El Ard, en la direksyon de Damasko. El transmisor estava en la validja de Eli. Kuando vinyeron a la frontiera El ard telefono a su amigo ke estava en la vanda siriana i este amigo dyo orden a los ofisyales de no egzaminar las validjas. Este modo pasaron la frontiera. Naturalmente ke esto le kosto a Eli un rushvet de 400 liras sirianas.
En retrospektiva savemoz ke i El Arad mizmo era ajan de los amerikanos.
Kuando Eli arivo a Damasko bushko i topo apartamento serka del komando (sede) militar prensipal de la armada siriana i serka de ambasadas etranjeras. Fraguo relasyones amistozas kon ofisyeres de grados altos en la armada i kon personas ke teniyan postos en altas sferas del governo siriano. Se izo kon eyos amigo de alta konfiensa.
Eli Kohen kontinuo a espiyonar 3 anyos asta 1965. En la primera semana ke arivo a Damasko partisipo en un balo organizado de parte de El Ard, kon la «High Society» de la sivdad. Eli partisipo, tambien, en un program del radio ofisyal Siriano, para Sirianos espanyolavlantes. El prezentador, ke era el direktor de las linguas etranjeras en el radio, lo prezento komo «Un ermano ke torno a su kaza i su korason yeno de amor por su pais». En 1963 su amigo de Argentina, Amin el Hafiz, se izo el prezidente del estado. En mizmo tyempo, Eli Teniya kontakto fuerte kon el sovrino del Mayor De La Armada. Teniya akseso a los ministros governales. Entrava a bazas militaras, se adjuntava a los ofisyeres en sus vijitas de las frontieras i arekojiya informasyones muy valorozas. El primer ministro lo tomava a Eli kon el, en sus vijitas en paises etranjeros. Eli teniya kontakto kon sekretaryas ke lavoravan en ofisinas governalas i aresiviya de eyas kopyas de dokumentos importantes, esto asigun el orden del prezidente.
Dos vezes al anyo saliya a Evropa, i de aya a Israel, para verse kon su famiya i tomar instruksyones de sus komandantes. Dingunos de su famiya i de sus amigos en Israel no savian nada da sus ovras. Es enteresante de notar ke en la mano de su ermano chiko, Moris (ke era soldado en la «fuersa de intelijensya» i responsable a los kontaktos kon ajanes ke estan en paises arabos), paso por aksidente un telegrafo kon la demanda «Es ke Nadia aresivyo la makina de kuzir ke le mandi?». Moris se fue a vijitar a su kunyada, vido la makina de kuzir mueva i entendyo ke su ermano esta en Siria.
Eli transmiso a Israel informasyones en todos los kampos de la vida en Siria. Levi Eshkol ke era el primer ministro en el tyempo de la «Gerra de 6 Dias» tyene dicho: «Las informasyones ke Eli moz entrego durante su servisyo moz trusheron la viktorya en la gerra. Sus ovras salvaron vidas de soldados de brigadas enteras.»
En 7 enero 1965, a las 8.00 de la demanyana, los Sirianos desbrocharon el apartamento de eli i lo aferraron. No se save en ke pozisyon estava. Emprimero toparon el eksplosivo aryentro del shavon i dospues el ekuipamyento de transmisar. Lo torturaron torturas fuertes. A la fin lo djuzgaron en tribunal militar i lo kondanaron a muerte. Todas las figuras de poder en el governo siriano estavan en espanto ke Eli las va a entregar. Por esta razon no permetyeron a dingunos a entrar a la sala del djuzgo ke solo a su avukato. El avukato fue mandado de Paris. Eli no fue djuzgado por espionaje, para ke no se reveren los kontaktos ke teniya. Lo djuzgaron ke entro a area defendida en la frontyera kon Israel, kulpa ke el kastigo es muerte. El estado de Israel izo esforsos grandes, enkluye moneda, para salvarlo. Entre ortros se metyo enmedyo el papa de Roma. Ma los esforsos no reusheron.
Albert Israel
