eSefarad Noticias del Mundo Sefaradi
Ver todos los artículos de esta sección
El oro i el fyerro
por Albert Israel
El oro i el fyerro eran muy byen amigos. Eran vizinos i moravan en las dos vandas de una pared.
El oro saliya kada demanyana al echo suyo. El lavorava en un djoyero. El jdoyero lo kemava kon una flama, lo aharvava kon un martiyo de fyerro i azia del oro maniyas, eskuralichas, kolyes… El fyerro saliya kada demanyana al echo suyo. El lavorava en el nalchelero. El nalchelero lo kemava kon flama, lo aharvava kon un martiyo de fyerro i aziya del fyerro nalchas.
Un dia oyo el oro ke su vizino, el fyerro, esta yorando de la otra vanda de la pared. Se fue a la kaza de su vizino i le demando deke estas yorando?
El fyerro le disho ke esta yorando porke el nalchelero lo esta aharvando kon el martiyo de fyerro.
El oro le disho: Mozotros los dos, estamos lavorando kaji 30 anyos. Kada dia mos keman i kada dia moz aharvan. Ya mos ambezimos a esta vida. Kale rezistir para trayer parnasa a kaza. Para trayer pan i azitunas ke koman los ijos. Esto es la vida dura muestra. Te olvidates? Kualo te afito oy? Deke estas yorando?
Le respondyo el fyerro: Mira oro! Kuando martiyo de fyerro te aharva ati, para ti es un ajeno. Te tuye el puerpo ama no ta tuye la alma. Kuando el martiyo de fyerro me aharva ami, para mi es un ermano. Kuando ermano aharva, tuye el puerpo, tuye la alma i tuye el korason!
Albert Israel
