eSefarad Noticias del Mundo Sefaradi
Trezladado por Liliana Benveniste
Florence Rena Sabin, nasida en el tersio dalkavo del siklo XIX, rompió tantas frontieras invisibles para las mujeres, ke su nombre, no solo figura entre las grandes de la medisina, sino entre las ke mas remarkaron para su jenero: fue una de las primeras sientifikas en medisina, la primera ke ayegó a dar klase en una universita i la prima ke alkanso a trokar leyes ke amijorearon la vida de milyones de personas pushando por la sanedad publika. En sensia, paso a la istoria por eksplikar el desvelopamiento del sistema linfátiko i sus deskuvrimintos sovre los vasos sangineos.
Al pareser, desde muy manseva Florence se interesó por la vida de un antepasado suyo que fue mediko yamado Levi Sabin, a ken su padre ubiera kerido imitar, i empesó a guadrar en secreto el dezeo de dedikarse a la medisina. Desde la eskola sigunda ya se izo evidente su talento para la sencia. Se dio el fakto deke, en 1893, el mizmo anyo ke eya se graduava en el «Smith College», por primera vez la Eskola de Medisina de la Universita Johns Hopkins admitió matrikolar a mujeres, lo kualo era su grande dezeo. Ma la famiyia Sabin no podía pagar estos estudios, ansí ke durante unos anyos dio klasas de matematikas i zoolojia para konseguir las paras nesesarias. A la fin, en 1896, entro a esta universita, siendo ke eya fue en akel kurso una de las 14 mujeres de una klasa de 45 personas.
Es ayi ande konosio a su kompanyera i se ke izo su amiga Dorothy Reed Mendenhall. A dinguna de las dos les plazia el ambiente ke tenian ke somportar. En una letra a su ermana, Florence le dezia: «No parese ke lavore bien basho esta presion. Tengo menester de un ambiente trankilo i agradavle… Nunka tengo tiempo para investigar». El solo lugar onde se sentía kontente era en el laboratorio, ande su firmeza i su kapachita de observasion atiraron la atansion del anatomisto Franklin P. Mall, ke la alesho por syempre de la praktika medika.
Mall la enkorajo a partesipar en dos projectos ke oy forman parte de su legado sientifiko. Uno fue el de kriar un modelo tridimensional del tronko ensefaliko de una kriatura rezin nasida. Akel modelo devino en 1901 en el sentro del rekonosido livro de teksto de Medisina «Atlas de la medula i el serebro medio». El otro projekto bushkava de notar la diferensa del desvelopamiento embriolojiko del sistema linfatiko umano. Florence konkluó ke se forma a partir de los vasos sangineos del embrión i no de otros tejidos, komo se kreía. Antes de eskapar la karriera, en 1900, ya avía escrito su primer artikolo sientifiko (Sovre las relasiones anatomikas de los nukleos de resepsión de los nervios koklear i vestibular). Toda una marka para una sientifika manseva en akeyos tiempos.
Boikot a las mujeres
Al anyo elvinien, en la Johns Hopkins se le dió una beka para lavorar kon Mall en el departamento de Anatomía, ande avia mostrado su grande talento para la investigasion anatomika. Komo al empesijo del pasado siklo la universita no keria kontratar mujeres, la finansiasion de sus investigasiones venia de un grupo eksterno ke dedikava fondos a apoyar a las sientifikas. Los artikolos ke publiko grasias a este ayudo tornaron a poner en klaro su grande abilidad investigativa. A la fin, la dejaron dar klasas; primero komo ayudante i en 1905 komo profesora asosiada, siendo la primera mujer en konsegir esto.
Kuando en 1917 Mall murio, se esperava ke Florence R. Sabin sea eskojida komo su suksesora en la direcksion de Anatomía. Por desgrasia, su jenero kontinuava a ser su kont5ra i, a pesar de las protestas de munchos estudiantes, eskojeron a un ex-elevo de Mall ke no tenía tantos meritos, ma era hombre. Komo konsolasion, la nombraron profesora titular de Istolojía, siendo en esto otruna vez pionera en okupar este posto, en el ke estuvo por syete anyos
En 1925, kansada de la diskriminasion machista en esta institusion, se troko al Instituto Rockefeller, kriado en 1901 en Niu York para la investigasion medika. Ayí podía lavorar a tiempo kompleto en sencia i kon un ekipo a su kargo, deke fue nombrada direktora de la seksion de inmunolojia selular. De muevo, a sus 54 anyos, era la primera en avrir otra puerta a las mujeres komo miembro de pleno derecho del prestijiozo sentro de investigasion.
Los rekonosimientos a su lavoro dezde estonses fueron mas i mas. Ya en 1924 avia sido nombrada prezidenta de la Asociasion Estadounidense de Anatomistas –de muevo pionera en konsegirlo–, i en 1926 también seria la primera en formar parte de la Akademia Nasionala de Sencias de Estados Unidos.
Komo investigadora, i en su parte komo membro del komité sientífiko de la Asosiasion Nasionala de Tikia (Tuberculosis), kriado para kontrolar esta hazinura, Florence se konsentro en las sélulas inmunes. Kería avedinguar el rolo de los globulos blankos en la defensa kontra las hazinuras komo esa infeksión. En el Rockefeller dirijía un grande equipo ke aplikava metodos sientifikos modernos a problemas medikos de kada dia i, no solo era responsavle de importantes investigasiones, sino ke kapachitava a la ke iva ser la sigiente jenerasion de sientifikos en el kampo mediko. Azia eskola.
En 1938, kuando tenía 67 anyos, se retiro, ma kontuneo a partesipar aktivamente en la komunidad sientifika a traverso de su korrespondensia kon kolegas o konsejando kuando se lo pedían. Ma no se kedo ayí.
Dompues de syete anyos de trankilo retiro, en 1944, el governador del estado de Kolorado le propozo de partesipar komo asesora sanitaria en el Komité de Planificasion de la Posgerra. Esto fue una revolusion en su vida. Por un anyo, Florence investigo sovre la abitual mankura de fondos i de personal en los servisios sanitarios publikos. A la fin, mando al politiko una letra onde remarkava “lo atrasado” ke estava el estado en salud publika. Komo konosia ke las leyes sovre atansión medika avía sido refuzada sempre por los dirijentes en el poder, se mostró muy dura en su demanda de una reforma sanitaria, batalya en la kuala se komprometio al sien por sien.
Mizmo su edad, se rekuedra ke ni las fuertes fortunas de nieve akedo de ke diera diskorsos en difieza de las reformas, akuzando direktamente a kenes se oponian a mejorear la situasion sanitaria de la poblasión. Todos esos esforzos dieron komo rezultado la aprobasion de un konjunto de leyes ke yevarian su nombre, las yamadas “Leyes de Salud Sabin”, ke lograron modernisar la ayuda en todo el estado. Entre otras medidas, se muchiguaron las kamas de los ospitales para tratar la tikia (tuberculosis) i en kurto tiempo se aflakaron muy muncho la kuantidad de kavzos.
En un diskorso delantre del komité de Salud Estatal de Illinois en 1947, Sabin komento ke el gobernador la avia eskojido para esta investigasion de ke eya era konosida i pensó ke, de ke eya esta “una aedada”, no iva a prekurar nada. Ma le salió mal la estratejia, ya ke se topo kon una mujer auzada a yegar asta la fin en la protejar la kozas ke kreía. Ya tenía 76 anyos kuando fue mentada jerente de salud en la sivdad de Denver, puesto ke aksepto, ama sin kovrar el salario korrespondiente: por tres anyos lo dono a la investigasion medika, lo ke amostra su grande kompromiso kon la sensia.
Retirada por sigunda vez, en 1948 desho el posto ma mantuvo su kompromiso en la proteksion de la sanidad publika. Finalmente, el 3 de oktobre de 1953 murioa kavza de un atako al korason i fue kemada en su sivdad.
En rekonosimiento por su dedicasion a la sensia medika i la salud publika, el departamento de Medisina de la Universidad de Kolorado se bautisó komo Edifisio Florence R. Sabin para la Investigasión en Biolojia Selular. Mas tadre, en 1959, Kolorado dono una estatua suya a la Kolección Nasional del Salón de las Estatuas i en 1973, fue inkluida en el Salón Nasional de la Fama de las Mujeres. Mas resientemente, en 2005, la Fakultad de Medidina de la Universidad Johns Hopkins onoro el legado de Florence Sabin nombrando una de sus kuatro fakultades en su nombre. Le uviera agradado saver ke era rekonosida en el lugar onde tanta diskriminasion duvo de sufrir.
Referensas
- Ashton D. Hall y Julia E. Kumar, Dra. Florence Rena Sabin (1871–1953): Redefiniendo el rostro de la medicina , Journal of Medical Biography , 2023
- Robert Tennent, Obituario , Hno. Med J. 2 (4843) (1953) 996-998
- Dra. Florence Rena Sabin , Cambiando el rostro de la medicina
- Florence Rena Sabin , Britannica
- Florencia Rena Sabin , Wikipedia
Otora Rosa M. Tristán
Fuente: mujeresconciencia.com
