eSefarad Noticias del Mundo Sefaradi
El primer Salon de Ladino de la sezon se avrio komo de uzo en BEIT REKANATI en Petah Tikva, el 5.Noviembre.2018.
Dr. Selim Salti avrio la tadrada diziendo ke el Salon de Ladino kompleto sus 13 anyos kon 118 enkontros i izo su dover en dando inspirasyon a 16 diferentes grupos de Ladino en diferentes partes del payis.
Las ermanas Matilda Sarano Kohen i Miryam Sarano Raymond mos presentaron el livro “SIAMO QUI, SIAMO VIVI” (Estamos aki, estamos bivos) editado por el jurnalista Roberto Mazzoli i ke no es otra koza mas ke el diario de Alfredo Sarano, padre de Matilda i Miriam, eskrito durante la okupasyon de los Almanes en Italia en la segunda gerra mundial.
Matilda mos konto ke eya se akodra de su padre tomando notas de sus penseryos i todo lo ke se pasava en akeyos diyas i las guadrava en un kashon. La famiya Sarano, fuyendo de Milano, fue eskondida en el konvento de Mombaroccio en Pesaro. El komandante de los Nazistas en Pesaro, ERICH EDER, todo en saviendo ke avia famiya de Djudios en el konvento, nunka no entro para deportarlos porke ya savia la fin ke los asperava.
En kontinuasyon, Miriam mos konto komo el livro salyo a luz. El jurnalista Roberto Mazzoli ke topo en el konvento un chiko diario del tiempo de la gerra pensó ke esto era un dokumento importante i empeso a bushkar los desendientes de la famiya Sarano. El enfin deskuvrio la existensia de las ermanas Matilda, Viktorya i Miriam en Tel Aviv i se metio en kontakto kon eyas. Las ermanas Sarano le dieron validja yena de papelikos ke aviya eskrito sus padre Alfredo. Roberto Mazzoli, durante 4 anyos no se kanso de investigar i edito enfin el livro Siamo Qui, Siamo Vivi.
La prefas del livro es eskrita por Liliana Segre ke es la sola sobreviviente de los 800 Djudios ke los Almanes deportaron de Milano onde bivian 14.000 Djudios. Munchos se salvaron grasyas a Alfredo Sarano ke era tresoriero de la komunidad de Milano ke miro de guadrar la lista de todos los Djudios.
El jurnalista Roberto Mazzoli reusho a topar también el ijo del buen soldado alman Erich Eder i organizar un enkontro en Mombaroccio kon las ermanas Sarano.
Si Matilda i Miriam están oy entre mozotros es grasyas a Monsignor Porta, papaz del konvento i el buen soldado Alman Erich Eder.
Ansi, el primer Salon de la sezon se termino kon muncha emosyon.
