eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
UN ANYO DE RADYO 2012
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 8 de janvier, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
El anyo 2012 ya mos s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 32 emisyones ke vos ize durante el anyo 2012.
Deke 32 i no 52? En primero porke uvo un djueves, el 2 de fevrero, ande estuve hazino (de la mizma manera ke aviya estado hazino el 3 de fevrero del anyo de antes por la misma razon, esta buen mal de abashada ke me kita la boz) ; en sigundo porke un otro djueves, el 8 de marso, kayo en Purim. Despues, malorozamente, el 22 de marso, Radio J teniya menester de mi tyempo de avla por modo de la matansina de Toulouse, el 19 de marso por Mohamed Merah i su muerte este mismo 22.
De otra parte, no uvo emisyon el 5 de avril porke teniya de guadrar a mis inyetizikos, ni el 12 por modo de un haham ke veniya avlar de Pesah, ni el 19 de avril por modo del Yom Ashoa, ni el 26 de avril por modo del Yom Aatsmaut. De tal manera ke no ize una sola emisyon de todo el mez de avril…Kale akodrarse tambyen ke no ize emisyones en julyo i agosto por modo de las vakansas, lo ke mos aze 9 djueves ande pasaron redifuzyones.
Despues uvo el djueves 20 septyembre sin emisyon por modo de la radyo ke teniya menester de mi tyempo de avla por modo de las fyestas (eramos entre Rosh Ashana i Kipur) ni uvo tampoko emisyon el primo de novyembre por modo de la vijita de Binyamin Netanyahu en Toulouse este diya, ni el 15 de novyembre por modo de la gerra de Gaza (operasyon pilar de defensa).
Enfin no uvo emisyon el 13 de desyembre porke la radyo tuvo menester de mi tyempo de avla en favor de Tsahal. Esto todo mos aze 20 djueves sin emisyones. De 52, kedan 32 emisyones.
Los ke son interesados de topar el teksto de mis emisyones pasadas de las kualas vos vo avlar agora las podra topar ( salvo una, la del 18 de oktovre, ke no fue preparada porke resivi a mi amigo Alain de Toledo) sovre el sityo Ladinokomunita, ama kale ser myembro (la inskripsyon es de baldes) . Una vez en el sityo, kale ir sovre Files, i aya sovre Edmond
Cohen. Mis emisyones se topan tambyen sovre el sityo eSefarad.com, aya no es menester de ser myembro. Kale meter mi nombre i klikar sovre Go. Ay tambyen unas kuantas de mis emisyones, ama no dainda las del anyo pasado, sovre sefarad.org. Kale bushkar djudeo-espanyol, i aya las emisyones de Edmond Cohen.
Kale dizir ke de vez en kuando, indome sovre sityos djudyos de Amerika del Sur, tengo la sorpreza muy agradavle de ver syertos de mis tekstos. Ansina es internet.
Esto dicho, la primera de mis emisyones de 2012, el 5 de janvier, fue para anunsyar la fundasyon de la asosyasyon CCJE Al Syete (Sentro Kultural Djudeo-Espanyol Al Syete – de la kaye Popincourt) aunando la mayoriya de la asosyasyones djudeo-espanyolas de Paris kon el eskopo de avrir un sentro kultural en el han del 7 de la rue Popincourt en Paris, ande nasyo el primer kal de los djudeo-espanyoles en 1909.
Esta emisyon anunsyava en el mismo tyempo una manifestasyon ke se deviya tener –i ke se tuvo kon muncho sukseso – el 22 de janvier.
El djueves de despues, 12 de janvier, avli de la vida i de la ovra de Salomon Ibn Gabirol, poeta , moralisto i filozofo espanyol, nasido en Malaga verso 1021, i muerto verso 1058, dunke bastante mansevo, mismo para esta epoka, en Valencia. La partikularidad de este Ibn Gabirol es ke era konosido de los djudyos komo Ibn Gabirol por tener eskrito el Keter Malkhut, i de los kristyanos komo un otro ombre, un arabo yamado Avicebron ke teniya eskrito en arabo Yanbu al Hayat, en latino Fons Vitae (la Fuente de Vida). Es solo en 1846 ke Salomon Munk amostro ke los dos eran en vedra una sola i misma persona.
El djueves de despues , 19 de janvier, vos akodri la memorya de un amigo defunto de Vidas Largas, Daniel Alkalay, ke este en Ganeden, i meldi dos de sus kuentizikos, i dos de sus traduksyones al djudeo-espanyol de kantikas fransezas.
El djueves despues, 26 de janvier, vos avli de una prima miya ke se aviya kazado djusto antes de la gerra kon un djudyo bulgaro. Malgrado ke un pulis franses los tenga akavidados de eskonderse una negra noche de septyembre 1942, i ke se fueron a eskonderse ande el ermano de esta prima, una negrinyada de vizina amostro el eskondijo a la polisiya i fueron aferrados delantre de mi primika ke teniya 6 anyos, i embiyados a Drancy i de aya en Auschwitz, komo lo supimos muncho mas despues. No aboltaron nunka. Son unos de estos miles de djudeo-espanyoles de Paris aferrados por la polisiya franseza i deportados por los almanes.
El djueves 9 de fevrero vos avli de los Sefaradim de Holanda, entre eyos ombres komo Baruch Spinoza i Manase Ben Israel, i mansevikas komo Anna Franck. Kreo ke estos tres son los djudyos olandezes mas konosidos. Los dos primeros eran sefaradim.
El djueves de despues, 16 de fevrero, vos avli de los djudyos antisyonistos, ke sea por razones relijiozas (komo los Neturei Karta) o politikas (komo los trotskistos). Oy ay syonistos bivyendo leshos de Israel, i antisyonistos ke biven en Israel. Ansina son los djudyos…
El djueves de despues, 23 de fevrero, vos avli de uno de los mas famozos hahamim de toda la istorya djudiya, es dizir Rashi, un fransez ke bivyo entre 1040 i 1105 en Troyes, i ke no solo komento el Tanah entero, ama tambyen el Talmud ! Es una ovra de gigante. Solo un Rambam puede ser komparado a tal savyo.
Los djueves primo i 15 de marso, vos avli de la istorya de los djudyos de Portugal, ke fue terrivle al kavo del siglo 15, kuando los reyes del Portugal ke aviyan akojido los djudyos de Espanya echados afuera, los guadraron prezoneros del pais i los forsaron a konvertirse. Tres siglos de Inkizisyon, de torturas i de martiryo sigyeron esta negrigura.
El djueves 29 de marso, para trokar un poko de este apretamyento de korason, vos avli de mi tiyo Leon, de su vida i de su manera un poko orijinala de ver las kozas.
El 3 de mayo, despues de un mes de vakansas ke no veniyan de mi ama de la radyo, me atrivi de avlarvos no solo en muestra lingua, el djudeo-espanyol, ama del djudeo-espanyol, lo ke no es la misma koza ; una koza es de avlar, otra koza es de ambezar a los otros, syendo ke no tengo dinguna kompetensya ni en gramatika ni en linguistika. Yene me atrivi de dizir lo poko ke saviya, i mi manera de afrentar la kuestyon del uzo de byervos turkos en muestra lingua.
El djueves de despues, 10 de mayo, vos avli de los djudyos ke lucharon kontra los Almanes durante la gerra en tanto ke djudyos, i mas en partikolar avli de la Brigada Djudiya de Palestina, ama sin olvidar ke estos djudyos de Palestina en la Brigada Djudiya fueron una lagrima en el oseano de un milyon i medyo de djudyos, lo mas rusos i amerikanos, ke lucharon kontra los almanes komo militares de sus varyos paizes.
El djueves de despues, 17 de mayo, meldi una « lettra avyerta al Dyo » eskrita por muestra amiga Angèle Saul, letra de akuzasyon a la vez kon umor i kon tristeza, i despues vos di mis propyos komentaryos sovre esta letra i otros eskritos – por egzemplo de Elie Wiesel – del mismo djiz.
Despues de esto, los 24 i 31 de mayo, vos avli de los djudyos de Espanya en la Edad Medya, istorya trajika porke los djudyos sufrieron muncho, no solo al kavo ama mismo al empesijo, del tyempo de los reyes Wisigotes, sin avlar de la epoka de la invazyon de los arabos Almoravides i sovre todo Almohades. Ya se ke uvo una epoka dicha la Edad de Oro, ama seriya muy falso de kreer ke los djudyos bivyeron komo pashas en la Espanya de la Edad Medya.
El djueves de despues, 7 de junyo, me arrepozi un poko, kontandovos la istorya romantika de la topada de Ruth i de Boaz, « varon barragan de fonsado » (ish gibor hail). Me agrada, de vez en kuando, akodrar una oja un poko romantika del Tanah, komo lo ize para la istorya de Shimshon i Delila, o mas despues de los ermanos de Joseph.
El djueves mas despues, 14 de junyo, vos meldi dos eskritos travados de la gazeta El Amaneser de mayo, el uno era un kuentiziko el tambyen muy romantiko – ya entenditesh mis gustos – de Rivka Abiry intitolado « Dos madres. Un nombre » ; i el otro un rekodro de Miriam Raymond travado del livro de Mathilda Koen Sarano « de la faja asta la mortaja ». Este rekodro era intitolado « mi primer diya de eskola ».
I el djueves de despues, 21 de junyo, vos meldi un eskrito travado del Meam Loez, del komentaryo de Bamidbar por Isaac Magriso. Es la konseja del kasap modesto, ke mos konta la istorya de un kasap destinado por ser el haver de un haham en el olam aba, porke izo una koza ke lo meresiya, render la novya ke tomava para su ijo al ke ambezo ser su novyo de antes.
I el djueves de despues, el 28 de junyo, vos avli de lo ke es el Talmud, ke no es koza chika, kon la Mishna i la Gemara.Es una ovra monumentala ke se eskrivyo siglos despues de siglos, en el kavo de la Antikitad i el empesijo de la Edad Medya. Todo el djudaismo de oy es fundado sovre las leyes del Talmud.
A mi ritorno de vakansas, el djueves 6 de septyembre , vos avli de los djudyos de Bulgariya, syendo ke pasi una parte de mis vakansas en Bulgariya. Ama para dizir la vedra, no es en Bulgariya ke me ambezi lo ke dishe sovre los djudyos de este pais, ama sovre internet. Vos akodri ke los djudyos de Bulgariya no fueron dados a los Almanes ni deportados, a la diferensya de los djudyos de los paizes okupados por la Bulgariya, i meldi los esmovyentes rekodros de Sara Golub, ke este en Gan Eden, bulgara ke fue la sekretarya de Vidas Largas durante tantos anyos.
El djueves de despues, 13 de septyembre, vos avli del hasidismo, un movimyento relijyozo nasido en Evropa del Este en el siglo 17, i ke dainda tyene muncho sukseso, por egzemplo en Fransya kon los hasidim de Lubavich. Aprovi de darvos a entender kualo es este movimyento, i deke uvo, i dainda ay, djudyos, yamados mitnagedim, ke se opozaron a este movimyento, el mas famozo de los mitnagedim syendo el Gaon de Vilna.
El djueves 27 de septyembre vos avli de una kreasyon famoza i orijinala de los primeros halutsim de Palestina en los anyos 1910, es dizir los kibutsim. Vos konti kualo eran, lo ke konosi porke dos vezes mori i lavori aya, i lo ke se estan azyendo oy, lo ke se solo por mis meldaduras porke ay muncho tyempo ke no me fui en Israel i no vide kon mis ojos lo ke se a echo el kibuts de oy.
El djueves de despues vos meldi tres kuentos de Rivka Abiry, ke mora en Haifa, intitolados « Kon boda i pandero », « Ven baylar kon el internet », i « Kalsados ». En dos byervos, el primero mos kontava komo la ke avla a la primera persona se izo ermoza para ir al bayle, i komo se arezvalo i kayo a basho, i komo un amigo de antes la izo alevantar, i Rivka eskapa la istorya dizyendomos : « Es a vozotros de djusgar kualo fue la fin de esta istorya. » El sigundo kuento mos dize en kurto ke en vezes mijor es kedarse kon amigos ke irse a otra parte del mundo. I el treser kuento era un poko de pulisiya , kon el umor de Rivka.
El 11 de oktovre vos akodri la istorya muy romantika – komo las amo – de Joseph i de sus ermanos, tal i komo mos esta kontada en Bereshit, en el Tanah. Es una istorya muy konosida, ama tan ermoza i esmovyente ke no pude rezistir a la gana de kontarla, afillu si por siguro ya la konosesh.
El 18 de oktovre arresivi mi amigo Alaoin de Toledo, ke vino para anunsyar las seremoniyas de meldadura de los nombres de los ke fueron deportados por los trenos de 1942, kada treno a la data aniversarya de su
ida para una destinasyon ke era deskonosida, i ke en vedra era Auschwitz.
Los 9 i 11 de novyembre 1942, fueron unos 1.300 djudeo-espanyoles ke se fueron en dos trenos.
El 25 de oktovre ize mi emisyon sovre la muzika i los djudyos, amostrando kuanto es koza importanta la muzika en muestra relijyon komo en muestra vida i muestras kostumbres.
El 8 de novyembre, a la okazyon de la salida de una traduksyon en kasteyano por la Senyora Martine Lemoine del livro de Haïm Vidal Sephiha « L’agonie des judéo-espagnols », ize mi emisyon sovre esta edisyon i este livro, i tambyen avli de Angel Pulido, syendo ke Martine Lemoine tambyen aviya eskrito su teza sovre este famozo espanyol amigo de los djudyos.
El 22 de novyembre, konti estas seremoniyas de los 9 i 11 de novyembre 2012 ke avian sido anunsyadas por Alain de Toledo, ama avli sovre todo del aferramyento de masa de la noche del 4 al 5 de novyembre 1942, ke fue una koza orrivle.
El 29 de novyembre, por la okazyon de la operasyon Pilar de defensa, kijo dizir la gerra kontra Gaza, konti komo de syempre los djudyos de Israel ograshearon kon los de Gaza, i esto desde los tyempos los mas leshanos, malgrado la aliansa kontraktada en Beer Sheva por Avraham kon Avimeleh, rey de los Pelishtim ke moravan en Gaza.
El 6 de desyembre, vos meldi un teksto del Meam Loez, komentaryo de Bereshit por Yaakov Huli, konsagrado a las bendisyones ke se deven de dizir por las buenas golores por las kuales ay de rengrasyar al Dyo i de bendizirlo, sin yerrarse, porke no es la misma bendisyon asigun la golor i de ande vyene.
El 20 de desyembre, vos konti la istorya ekstraordinarya de la salvasyon , en 1976, de los rehenes djudyos en Entebbe, en medyo de la Afrika, por los komandos de Tsahal. Nunka uvo en la istorya tal marafet. Dainda los ke lo izyeron no entyenden komo reusheron.
I el 27 de desyembre, kijo dizir la semana pasada, vos avli de los Djudyos de Algeria, ke no moran mas en Algeria, i estan agora en Fransya, ande arrebiven el djudaismo por sus prezensya.
Kon esto me keda de desharvos, sin olvidar de dezearvos a todos,
keridos oyentes, mis mijores dezeos para una anyada sivil yena de buenas kozas.
Al djueves ke vyene, si kyere el Dyo !
Edmond Cohen
