eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
21. La gerra, la invazyon almana, La Baule
En septyembre 1939, la gerra es deklarada a la Almanya, i empesa la « drôle de guerre » (la kuryoza gerra), segida por la invazyon almana en 1940.
Betty, antes mismo del ekzodo, se va kon mi (tres anyos i medyo) a La Baule. Albert se keda kon sus dos ermanos en Paris, ama a la yegada de los Almanes, se van en djuntos, i a pye, sovre los kaminos del ekzodo, pushando delantre de eyos una chika arabaika de bebé, kargada de sus proves bagajes, en medyo de la ekstraordinarya djentorya de toda una povlasyon de milyones de djente fuyendo. Abashan verso Corbeil i Melun, durmen en los kampos ande pueden, se apersiven a la demanyana ke durmyeron al lado de un aerodromo ke riskava muncho de ser bombardado… Eskapan por topar un treno indo a Saint-Nazaire, i reushen de ayegar a la famiya en La Baule.
Pokos rekodros por lo ke es de mi : un otel, una kriatura, puede ser el ijo del amo del otel, ke se yama Philibert (ke, a lo ke oyi, saltara sovre una mina mas despues), los banyos de mar – espantadores i yelados, yoro, no me plaze – la yegada a la villa Paulina, sonamos a una kampanika a la puerta, de muevo un treniko , blanko, mi madre i yo aryentro, Papa ke korre detras en riyendo (lo ke me da oy a pensar ke su pacha rota dos anyos antes se enderecho bueno i bastante presto) …
Lo ke me akodro lo mas fuerte, por siguro, es la yegada de los Almanes en La Baule : una armada ke parada al « paso de la patona », yo topo esta manera de kaminar muncho de reir, me abolto verso mi madre para ver si esto la englenea eya tambyen, i la veo pálida komo un chamashir, la kara espantada… me kedo aterrado…
Es en La Baule ke afito a Rodolphe Morain, uno de los ijos de Isaac Bohor Morhaïm i de Ventura, ermana de mi vava Sultana, dunke primo ermano de mi padre, i del kual ya avli en el kapitolo 17 komo haver, primo i kunyado de mi tiyo Victor Cohen, una aventura bastante kuryoza, ke me konto el mismo. A la yegada de los Almanes en 1940, el tambyen se fuyo asta La Baule. Kazado desde poko i padre de una chika de dos anyos, esta kaminando kon su mujer en una kaye de la sivdad, los dos muy abatidos, komo lo fue mi madre, de verse kaidos en la trampa de este Hitler ke se amostro tan amenazante verso los djudyos.
I kualo estan vyendo los dos, ayegando djusto frente a eyos ? Un zabit alman ! El primer zabit alman ke ven, ayegando frente a eyos kara kon kara ! Atyo santo, ke azer ? Demaziya tadre para fuir, ya esta delantre de eyos…I na ke les esta avlando : « Ola, Rudolf ! (mi primo se yama Rodolphe) no me rekonoses ? » Mi primo no kree a sus ojos i orejas ! i se oye responder : « Por siguro, Theo Jung, si, agora me akodro de ti, eras el kapo del orkestra amador ande yo djugava kuando me ambezava el vyolon en Estambol ! » De toda la armada almana, mi primo se teniya kaido sovre un zabit ke teniya konosido komo muzikante en Estambol ! I este zabit, tresalido de verlos, los kombida para bever kon el ande el mijor kavedji de La Baule… Kon muncha diplomasiya, mis primos refuzan el kombite…Lo ke mankava es ke pareskan desdel primer diya de la invazyon almana komo kolaboradores, azyendo amistad i bevyendo kon los enemigos !
A kontinuar…
Edmond Cohen
Paris, Fransya
Fuente: LK/eSefarad
