Muestra lingua: MIS AMIGOS DE LADINOKOMUNITA por Edmond Cohen

Keridos amigos,
Mi emisyon de djueves vo avlar de mis amigos de Ladinokomunita.

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

MIS AMIGOS DE LADINOKOMUNITA

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.

Vos akodro tambyen ke el proksimo atelye de konversasyon de la asosyasyon Vidas Largas se tendra el lunes 15 de desyembre de las tres a las sinko, en el Centre Communautaire, 119 rue Lafayette Paris (9°) Métro Poissonnière o Gare du Nord. Tened tino ke agora es un lunes i ke la ora es tres.

En una emisyon ke vos aviya echo el 20 de djunyo 2013, dunke ay kaji un anyo i medyo, vos aviya avlado de mis amistades grasyas a internet, entre las kualas eskapi kon las ke me ize grasyas a Ladinokomunita, este foro internasyonal ande se akojen djudeo-espanyoles del mundo entero, i tambyen djente ke no son djudeoespanyoles ni mismo djudyos, ama ke vyenen por amistad para la lingua i sus lokutores. Yo konosi este sityo verso 2005, kuando Michel Azaria me disho de irme a mirar lo ke se aziya aya.

Esto dicho, kuando en djunyo 2013 kije avlar de mis amistades grasyas a Ladinokomunita, ya me topava al kavo de la emisyon, i solo avli de Eliz Gatenyo, ke aviya konosido sovre este sityo, i ke tuve despues el plazer de konoser kara kon kara kuando vino en Paris kon su marido Selim, vinyeron mismo aki avlar kon mi en la radyo el 10 de novyembre 2011, aze dunke unos tres anyos de esto.

Oy tuve la gana de avlarvos de unos kuantos de los otros amigos ke me ize sovre este sityo de Ladinokomunita, la muy grande mayoriya, i en todo kavzo todos los ke no moran en Paris (salvo los Gatenyo, komo vengo de dizirvos), syendo amigos virtuales ke nunka  vide. I, por dizir la vedra, aki vo nombrar komo amigos a djente ke no saven ke son mis amigos, i es vedra ke munchas vezes no mos avlimos ni una sola vez. Ama yene los konosko, me alegro de meldarlos sovre el foro, i los konsidero komo mis amigos afillu si no lo saven.

Por siguro, tengo de nombrar en primero a Rachel Amado Bortnick, la ke fundo este sityo al empesijo de 2000, ay unos kinze anyos, despues de un viaje en Israel, ande asistyo a un kolokyo i le vino la idea i la veluntad de luchar para muestra lingua. Desde estos kinze anyos, no ay diya sin ke se okupe de su sityo ke tyene agora 1.500 myembros i ande se eskrivyeron mas de 50.000 mesajes, algunos kurtos, algunos largos, ama todos en djudeo-espanyol, ke forman una ensiklopediya ke se puede komparar, por su rikeza, a Wikipedia sovre muestra lingua, muestra kultura i muestra istorya. Yo uvyera pudido verla kuando mos topimos, eya komo yo, en Auschwitz en marso 2003 para la inogurasyon de la laja en djudeo-espanyol, ama en este tyempo no mos konosiyamos syendo ke yo no konosiya dainda Ladinokomunita. Ke pekado!

A parte de Rachel la fundadora, konosi muy presto a la ke moderava los mesajes, Rosina Karako Smeraldi de bendicha memorya. Eya me eskrivyo i me embiyo su foto, manera de azer konosensya, yo le embiyi la miya, i fue el empesijo de una grande amistad. En Ganeden ke este.

Kedaron otros moderadores, komo Yehuda Hatsvi, ke mora en Israel i ke yo pensava ser haham tan savyo lo topi, i fui muy enkantado kuando mos eskrivimos i ke me ambezi ke afillu su savidurya, no era haham.

Otra moderadora, Guler Orgun, ke bive en Estambol. Kon eya mos avlimos al telefono kuando kije abonarme a El Amaneser. Komo lo ke se paso kon Eliz Gatenyo, mos avlimos komo si eramos vyejos amigos desde syempre…

I para eskapar kon los moderadores, tengo de nombrar a Moshe Gormez, ama el lo konosko en vedra porke bive en Paris i vyene a los atelyes de konversasyon. Ansina es ke lo vide el lunes pasado. Su prezensya es presyoza para mozotros, porke el es el solo entre mozotros en el atelye ke sepa a la vez el turko, el ebreo, el franses i el djudeo-espanyol (salvo, por siguro, Haïm Vidal Sephiha, ama malorozamente kon su edad i su salud no puede mas venir a muestros atelyes).

Estos son los moderadores, ama ay los myembros de este sityo. Por siguro no konosko a los 1.500, ama yene konosko bastante myembros, kada uno en una parte del mundo.

Por kyen empesar? Tengo la gana de empesar por Miguel de Mexico. El es ke empeso de eskrivirme en un djudeo-espanyol a la selanikliya de las mil maraviyas. Komo este mansevo – deviya tener unos vente i sinko anyos la primera vez ke me eskrivyo, agora deve ser en los trenta i piko – komo este mansevo ke no bive en la sivdad de Mexiko, ama el medyo del pais, leshos de toda vida djudiya, komo se ambezo muestra lingua, es un misteryo. Mos izimos grandes amigos, i ishalla va venir en Evropa el anyo ke vyene, i tendremos la okazyon de vermos enfin. Ama ya konosko su kara por las fotos ke me embiya por internet. Kara de haliz meksikano…

En los Estados Unidos tambyen me ize una amiga – aparte de Rachel Bortnick – es Becky Franco. Esta ermoza pintora ke aze maraviyas de pinturas ke me tresalgo de ver en fotos es de orijen kubana. Se fuyo de Cuba mansevika i agora se izo una grande artista. Es ande eya ke se aviya ido a morar muestra amiga Betty Saul, ke este en Ganeden. Kon eya tambyen mos eskrivimos de vez en kuando, syempre para mi kon muncho plazer.

I si avlamos de pintura kale avlar de Miriam Cuneo, eya bive en Uruguay i aze una pintura muy diferente de la de Becky, Becky realista i klasika, Miriam personala i kontemporanea, a lo manko ansina lo veo kon las fotos. Kon eya tambyen mos eskrivimos kon plazer.

Tambyen en Amerika del Sur, tuve el grande plazer de azer la konosensya virtuala de Liliana Benveniste i de su marido Marcelo, ke fundaron en Buenos Aires el sityo eSefarad.com i ke me azen la grande onor de meter el teksto de mis emisyones  en sus sityo kada semana, kon ilustrasyones ke topan a kada vez, no se komo azen de topar tan presto la buena imajen. Me demando lo ke van a topar esta vez!

No se puede deshar a la Amerika sin aboltar en los Estados Unidos i avlar de Albert Garih en Washington i de Benni Aguado en New-York.

Albert Garih ya lo konosko de vedra porke varyas vezes vino en Paris, una vez vino a vermos en un atelye de Vidas Largas, otra vez estava en Paris el diya de la manifestasyon por la memorya de Ilan Halimi, este manseviko franses torturado i matado por una banda de antisemites. El padre de mi primika Maryse, primo ermano i en mizmo tyempo kunyado de mi padre (los dos primos se kazaron kon dos ermanas) era un Garih de la mizma famiya ke este Albert. El Garih a la orijen de la famiya turka veniya de Bagdad.

En kuanto a Benni Aguado, lo konosko sin konoserlo. No mos eskrivimos, ama meldo kon muncho interes sus intervensyones sovre Ladinokomunita. Konose muy byen muestra lingua, afillu si la yama ladino, lo ke es un yerro. I es uno de los muy pokos de los muestros ke dainda sepa meldar i eskrivir en solitreo. Puede ser ke kon el ayudo de El Amaneser ke mos ambeza kada mes un poko de solitreo mos toparemos un diya todos savyendo meldar i eskrivir en solitreo, ama dainda estamos leshos de esto.

De la misma manera, konosko a Simon Geron sin konoserlo. El bive agora en Australia. Eskrive muncho, inkluyendo poeziya. I tyene el uzo de trasladar artikolos travados de varyas gazetas, kuando pensa ke puede ser de algun interes.

En Evropa, konosi a munchos myembros, i por empesar los ke biven en Fransya ama no en Paris, i ke nunka vide: Robert Cohen (ke eskrive kon el nombre Cobert Rohen) ke bive en Nisa, Rosy Hemmo ke bive en Chateauneuf (un kazaliko serka de Grasse, Ida Simon Barouh ke bive en Rennes, i mismo ay los ke biven en Paris ama ke nunka vide, komo Linda Darmon o Albert Tari. I ay, por siguro, los ke konosko de verlos, komo el Profesor Sephiha, Michel Azaria, Renaud Souhami, Jenny Laneurie, ets

Robert Cohen, de Nisa, tyene la misma edad ke yo i komo mos yamamos lo mismo, me yama su primo, manera de avlar … El fue, kon un otro nombre, eskrivano de romansos kon avyones. En jeneral mos entendemos byen porke somos d’akodro sovre munchas kozas.

No tengo haberes de Rosy Hemmo desde 2012 , porke no eskrive mas, estos tyempos, en Ladinokomunita. Ama antes eskriviya bastante, i avlimos de varyas kozas, komo la Inkizisyon (ke interesa tambyen a Robert Cohen) o la suerte de los djudyos en mano de los Italyanos en 1943.

Por lo ke es de Ida Simon Barouh (ermana de Nelly Hanssson ke vyene de desharmos la buena vida) es una mujer muy amistoza ke no desha de dezear los kumpleanyos, las fyestas i ke embiya a kada vez un mesaj.

En kuanto a Linda Darmon, de famiya Mouchabac, vide ke yo ya konosiya muncha djente de su famiya de la parte de Mouchabac.

No konosko a Albert Tari, ama vide ke konose muy byen las linguas iberikas, i sus intervensyones son en vezes muy provechozas.

No vo avlar aki del Profesor Sephiha, de Michel Azaria, de Renaud Souhami o de Jenny Laneurie porke, afillu si son myembros de Ladinokomunita, no es por este sityo ke los konosi. Por egzemplo, konosi al Profesor Sephiha de antes de 1970, anyo en ke mos topimos en djuntos en un kongreso sefaradi en Amsterdam, kijo dizir trenta anyos antes del nasimyento de Ladinokomunita.

Ama la Evropa es grande, i konosi por Ladinokomunita djente de munchos paizes: Nisim Koen en Sofia (Bulgaria), Nicola Vuletic en Croatia, Michael Halevy en Hamburg, Matilda Barnatan en Espanya, i su ija Rachel.

Kon Nisim Koen, de Sofia, mos yamamos lo mismo, syendo ke Cohen so tambyen, i ke mi nombre djudyo, venido de mi papu, es Nissim. Kuando me topi en Bulgariya en julyo 2012, kon muncha amabilidad me kombido a verlo en su kaza, ama malorozamente yo me topava kon mi mujer al bodre de la Mar Negra a 400 km de Sofia, i kon la kalor ke aziya estavamos demaziya kansados para azer el viaje. Pekado…

Nicola Vuletic, en vedra no lo konosko, ama yene lo konosko porke de vez en kuando vyene en Ladinokomunita i mos da haberes de los djudyos de Croatia (mora en Zadar). Me tresalgo de meldar su manera tipika de pronunsyar muestra lingua, dizyendo u en vez de o komo lo aziya la grande Clarisse Nicoidsky nasida Abinun, una poeta ke se fue muy temprano.

Michael Halevy, ke mora en Hamburg, es un universitaryo, komo Bryan Kirchen en Los Angeles o Devin Naar en Seattle. Avli de eyos tres kuando ize mi emisyon sovre los luchadores para muestra lingua. Son eyos la mueva jenerasyon de universitaryos ke mantyenen a muestra lingua, i es una rikeza de meldarlos.

Matilde Barnatan mora en Espanya kon su ija Rachel, i de eyas tambyen ya avli en mi emisyon sovre los luchadores para muestra lingua, porke no solo eskriven poeziya, ama tambyen avlan en la radyo espanyola, i vyenen en Ladinokomunita. Ansina es ke las konosi. I ya se ke eyas me konosen tambyen, porke aze poko Matilda eskrivyo kozas muy amavles sovre mi, ke sea a propozito de las fotos de mi padre o de mi emisyon sovre la brigada djudiya, ambezandome ke su ija  Rachel djugo presizamente en un filmo intitulado Barroco ande es brigadista.

Despues de la Evropa, ay Israel, i aya, aparte de Yehuda Hatsvi del kual ya avli, konosko varyos myembros komo Rivka Abiry, Selim Amado, Moshe Shaul, Zelda Ovadya, Matilda Koen Sarano.

Konosi Rivka Abiry porke ay unos kuantos anyos le eskrivi para obtener su otorizasyon de meldar a la radyo uno de sus kuentos maraviyozos. No solo me respondyo, ama no me akodro komo vino, ama mos topimos avlarmos por Skype, en djudeo-espanyol. De este tyempo, munchas vezes me permeti de meldar kuentos suyos en mis emisyones de Radyo.

Lo mismo fue kon Matilde Koen Sarano, ke biviya en Yerushalayim, agora mora en Peah Tikva. Le demandi otorizasyon no me akodro agora para kualo meldar, tanto eskrivyo kuentos, atikolos de lingua, kantikas , teatro, ets ets. Eya tambyen es una mujer muy presioza, i puedo dizir lo mismo de Zelda Ovadya i Moshe Shaul ke dirijen Aki Yerushalayim, i sus intervensyones en Ladinokomunita mos ambezan muncho.

En kuanto a Selim Amado, ke es el ermano de Rachel Bortnick, de vez en kuando tenemos diskusyones entre los dos sovre dos kuestyones: meter o no meter byervos turkos en muestra lingua kuando el byervo espanyol egziste tambyen, i la vyeja kuestyon del nombre de muestra lingua, ke todos los de Israel kyeren yamar ladino, lo ke aze konfuzyon kon el haliz ladino.

Aki vos avli de unas vente personas, i por siguro uvyera avlado de mas munchas si teniya el tyempo para esto. Kale akodrarvos ke los myembros de Ladinokomunita no son vente, ama 1.500.

Esta toda djente, ke lo sepa o no, aze agora parte de mi vida, i forma una haliz komunita, i Rachel Bortnick tuvo buena idea de yamar komunita a este grupo…antes ke egziste! I yo ke no ize dingun de los munchos viyajes organizados  kada anyo por Ladinokomunita, i ke por esto tambyen no konosko a la mayoriya de la djente ke nombri aki, me syento tener un alay de amigos afillu si dainda son solo virtuales.

Lo ke mos falta, es tener mas mansevos i mansevas ke vengan en este sityo, i ke se ambezen de avlar muestra lingua, ke lo merese.

Agora ya vino el tyempo de eskapar esta emisyon, i vos digo al djueves ke vyene, si kyere el Dyo!

Edmond Cohen
Paris – Fransya