Muestra lingua: MEAM LOEZ ATADURA DE ITSHAK – 8 por Edmond Cohen

Keridos amigos,el djueves pasado no ize emisyon i dunke no embiyi aki un teksto, syendo ke a la ora djusta de mi emisyon me topava en la Mayoriya del 17en arrondissement de Paris por el kazamyento sivil de mi ijo. Alhad fueron el kazamyento relijiozo i la fyesta. Lunes, martes se tuvyeron aki i aya i oy myerkoles se van a tener las sheva berahot en mi kaza. I en medyo de esto todo yo no puediya olvidar ke Avraham se topava sovre un altar kon su ijo Itshak atado, i me demandava kualo le va afitar myentres ke yo esto kazando a mi ijo. Enfin, de esto todo vos kije avlar en mi emisyon de amanyana djueves..

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos!
Edmond Cohen
Paris, Fransya

MEAM LOEZ ATADURA DE ITSHAK – 8

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 7 de janvier, de las dos i un kuarto asta las kuatro i medya-sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.

El djueves pasado no vos pude azer mi emisyon semanala, syendo ke me topava a la mizma ora en la Mayoriya del 17en arrondissement de Paris para kazar mi ijo bohor (despues de tener kazado el chiko mueve anyos antes).

Konosyendo la edad medyana de mis oyentes, no tengo la pretensyon de ambezarles kualo es kazar a un ijo, por los tyempos de oy. Por siguro es una grande alegriya, ama yene kale dizir ke es lo ke los amerikanos yaman a full time job, un lavoro ke vos toma la kavesa durante sesh mezes.

Tuvimos de okuparmos de rezervar la Mayoriya, i mi ijo tuvo de aparejar los papeles ke son menester, i  mozotros kon los futuros kosuegros el bufe il el lokandero para este djueves. I tambyen el fotografo. I las vestimyentas para la Mayoriya.

Ama komo ya lo savesh, esto todo es bavajada al lado de los aparejos para el kal i para la fyesta de despues, ke fueron el alhad pasado.

Kale topar el kal. Kale topar komo las arabas van a azer para topar lugar de parking. Kale bushkar ande meti mi ketuba. Kale topar el muzikante para el kal. Kale topar las vestimyentas para el kal.

Kale topar el lugar para la fyesta despues del kal, i por esto irse en munchos lugares ke no van ( muy leshos, muy basho de tavan, muy feo, ets ets). De toda manera, se eskoje en djulyo, kuando ay sol i kaentor, una sala para el 22 de desyembre, de noche i en el friyo, puede ser inyeve, kyen save?

Una vez ke se topo la sala, kale topar el lokandero ke tyene de dar a komer a los musafires. I para eskojer, yene kale ir a varyas bodas en varyos lugares, a sola fin de eskojer el ke aze las mijores komidas.

Una vez ke enfin ya se eskojo el lokandero, i ke ya mos metimos d’akodro kon lo ke se va dar de komer – mi mujer keryendo ke ayga aringa, mis kosuegros ke ayga abudaraho, ets, – se pueden enfin aparejarse las kartas de kombido, kon una mujer ke yo yami Jennifer Lopez, afillu si era muy fea la povereta, akodrandome el filmo amerikano The Wedding planner, i esta keriya muncho azer lo mismo, ama sin la misma kapachedad.

Una vez ke tyenes las kartas medyo en ebreo medyo en franses, te apersives ke el basmaanedji eskojido por Jennifer Lopez es un kristyano muy amavle, ama ke no konose nada del ebreo i mete todo charpik, por egzemplo Binyamin a basho de Laurence, i Hanna Orli a basho de Benjamin. No embarasa, le ambezi a eskrivir el ebreo komo kale.A la derecha de la karta, aviya una ermoza hupa kon los byervos en lashon  ani le dodi ve dodi li (yo so para mi espozo i mi espozo es para mi).

Despues kale embiyar las kartas una vez echas,  i por esto azer la lista de los musafires kon el adereso de kada uno. Si kombidas fulano kon sus ijos, i su ermano, kale kombidar tambyen los ijos de este ermano, mizmo si no los konoses,  sino se puede arravyar. Son kazados? Kale kombidar las mujeres tambyen. I las kriaturas?

Eskrivir los aderesos sovre las envelopas, apegar los pules, ya toma bastante tyempo. Despues kale asperar las repuestas de kada uno. Este no save si va pueder vinir. Otro dize ke ya va vinir, despues ke finalmente no va pueder vinir, i despues ke finalmente si, ya va pueder vinir. Ay tambyen los ke no responden del todo, i ke kale yamar para saver.

Una vez ke ya se save mas o menos kyen va vinir i kyen no va vinir, kale dechidar ande asentarlos, azyendo dikat de meter en djuntos djente de la mizma famiya, salvo si son arravyados entre eyos. Son todos arravyados? Bueno, vamos a meter kada uno en otra meza.

Kale tambyen eskojer las vestimyentas para el kal. I para mi mujer tambyen la vestimyenta para la fyesta.

Kale topar los orkestras i el DJ para la muzika de la fyesta. I komo eskojer sin ir a oyir los kandidatos aki i aya? I meterse d’akodro entre mozotros i los ke van a ser muestros kosuegros. Mi mujer lehliya kyere klezmer. La famiya de la ke va ser mi ermuera vyene de Tuniziya i kyere muzika oryentala. Mi ijo kyere rock. I yo en medyo kyero la paz. Tengo de eskojer kualo va pasar el DJ…

Esto todo es para la muzika. Ama kale tambyen eskojer las flores.

I no avli de ir andel berber, para tener buen peynado, i el djueves de la Mayoriya, i el alhad del kal i de la fyesta.

Entremyentres mi ijo mas chiko, ke el ya esta kazado desde unos 9 anyos, se okupa de una parte del enterramyento de la vida de bekyar de su ermano, de otra parte de azer una video en sekreto kon los amigos i la famiya de los espozos. I yo tuve de kantar para la video.

Kurto vo lo azere, ya se aserka el diya del kazamyento sivil a la mayoriya. Kualo dize la meteo? Ke va aver luvya el djueves i el alhad. No el vyernes ni el shabath, solo los diyas de djueves i alhad ke son los diyas de los kazamyentos sivil i relijyozo. Bereket, dizimos en este kavzo. Los fransezes dizen: kazamyento luvyozo, kazamyento orozo.

Esto todo para dizirvos ke el kazamyento de mi ijo, no se si va ser orozo, ama lo ke es siguro es ke la luvya izo lo ke pudo para esto… Mi mujer, en buena lehliya, era muerta de sar i de apretamyento de korason. Ama a poko a poko, vyendo ke las kozas se metiyan en orden, se le aflosho un poko la alma.

I yo? Yo me meti el vestido,  la kamiza i las kalsas ke me merki por la okazyon, i por lo ke es de los kalsados, meti los de mi propya boda., ke no aviya metido desde este diya. Agora puedo dizir ke los yevi dos diyas, separados de mas de 41 anyos.

En su diskorso, el haham mos avlo del rolo de la mujer en el djudaismo, ke es muy importante (asigun el). Ama yene el marido tyene de tener la ultima palavra sovre su mujer. Si. Ama kualo es esta ultima palavra? : Si, kerida. En pokos byervos, este haham konto ansina la istorya de mi vida, i la de munchos maridos ke konosko…

Esto era alhad. I despues? Despues se azen las sheva berahot, un diya en kada kaza, lunes en la kaza de mi ijo chiko, ke lavoro muncho en favor de su ermano, martes en la kaza de mi kosuegra, ayer myerkoles en mi kaza. Agora me ambezi ke lo mas yuch,  para las sheva berahot, no es de aparejar de komer, tanto kedo de la boda. No. Lo mas yuch es de arrekojer diez ombres. Martes, no fue posivle, ama topimos un ijiko de dodje anyos, i uno disho ke era posivle de azer el minyan si teniyamos un ijiko de mas de mueve anyos. I ansina dishimos las sheva berahot. Despues meldi sovre Wikipedia ke en vedra la kuestyon es muy shupeliya…El Shulhan Aruh no lo permite, ama syertos hahamim dechidaron ke si.

Bueno. Agora ke ya kazi mis dos ijos, kon ermozikas i buenikas mujerikas, me syento kansado ama alivyanado. I vo pueder de muevo okuparme de muestro padre Avraham i de Itshak su ijo, ke deshimos a la ora ande el mallah ordena a Avraham de no degoyar ni aogar a su ijo, i Avraham no entyende deke un orden i despues otro.

I agora vamos a ver lo ke respondyo el Santo Itbarah a Avraham.

Kontinuo mi meldadura:

Le respondyo el Santo Itbarah, dizyendo: Nunka demudi mi avla, ni me arrepinti de lo ke dishe. Ma savras, Avraham, ke no entendistes el deklaro de mi avla. I esto es mashal (parabola) a un rey ke estava komyendo kon su amigo, i estando gustando (en la otra edisyon esta gustozo, ke es puede ser mijor) le disho el rey: «Kyero ke traygas a tu ijo ensima de la meza». Koryo akel ombre i trusho a su ijo kon el kuchiyo de shehita en la mano para degoyarlo i ponerlo en la meza. Lo arifto ( le dyo a entender) el rey, dizyendo:  «Yo no te dishe ke lo mates a tu ijo para komerlo, solamente te dishe ke lo pongas ensima de la meza. Kije dizir ke tanta amistad te tengo, ke a tu ijo kyero ke me lo traygas delantre en el mijor lugar.» Lo mizmo es esto, ke yo no te dishe ke lo degoyes a Itshak, sola mente te dishe: vealaleu sham le lola (alçalo ahi por alçacion), i si yo teniya gusto ke lo degoyaras te diziya vealaleu sham ola (alaçalo ahi alçaçion). Ma esta lamed de leola es avizo ke lo pongas a tu ijo en lugar de la ola, i por esto te avli una avla serrada para ke te enganyes y penses ke kyero ke lo degoyes. I kon esto se puvliko tu djudezmo por el mundo. Agora, syendo ya izistes mi palavra de suvirlo a Itshak ensima del mizbeah i lo atastes komo la behema (el animal), te se konta komo si lo ayegaras por korban (sakrifisyo); por esto, soltalo i vate kon el leshalom.

Le respondyo Avraham, dizyendo: Ya djuri shevua hamura (djuramyento pezgado, seryozo) de no menearme de aki asta ke me aprometas kon shevua (djuramyento) de kumplir mi demanda de todo lo ke te diré. Onde es ke tu me tyenes aprometido akeya noche de Pesah ke me amostrastes las estreyas i me dishistes ke asigun no se pueden kontar, ansi sera mi zera (desendensya) muncho de muncho, ke dita avla fue por Itshak, asigun me dishites: ki beItshak yikare leha zara (que en Yshac sera llamado a ti semen). I kon todo esto, kuando me dishistes Ve aaleu sham leola (y alçalo ahi por alçacion), abati el yetser ara (negro instinkto) i vine korryendo para degoyarlo kon mi mano, i si keriya podiya refuzar tu komando syendo me aprometistes de kitar de este ijo linaje. Agora kiero ke kuando pekaran los ijos de Itshak i mereseran alguna pena, ke te akodres de esta akeda (atadura) de Itshak  i sea estimado delantre de ti komo si lo degoyara mammash (en vedra) i se uvyera kemado i su siniza estava en el mizbeah, ke ansi pensava de azerlo; i por este zehut les pedrones los pekados de Israel i los eskapes de angustya. I mas kyero ke djures de no prevarme mas nunka, ni a mi ni a mi ijo Itshak, ke syendo ya me tyenes prevado diez vezes, kyero ke me djures de no prevarme mas, porke no kyero tener tsaar kada ora, i me espanto del yetser ara (negro instinkto) no me kavze algun dezastre, has veshalom.

Le respondyo el Santo Itbarah, dizyendo: Syendo tu avlastes tu parte, yo tambyen diré lo ke kyero. Onde es ke kuando pekaran los ijos de Itshak , sepanse ke kada diya de Rosh Ashana djuzgo a kada uno de chiko asta grande, i asetensyo sovre kada uno asigun merese kefi de (asigun) los maasim (los echos, las aksyones) ke aze, ke todo esta eskrito en livro. I si es ke kyeren ke les bushke zehut i me akodre de la akeda de Itshak, deven de tanyer shofar de Rosh Ashana, i kon esto tendran provecho grande. I tente por siguro i kontente ke esta preva de la akeda kontrapezo kuanto todas las prevas ke se konosyo, ke tu djudezmo es betahlit a aharon (astal ultimo limito), por amistad del Dyo i no por ningun interes, i mas preva ke esto no se puede azer. I lo mizmo te asiguro ke no tendras ningun modo de yesurin (tormentos).

Le demando Avraham al Santo Itbarah, dizyendo: Esto ke me dizes ke deven mis ijos de tanyer shofar no se ke koza es, i primera vez es ke tal syento este nombre de shofar.

Le disho el Santo Itabarah: Abolta la kara i lo veras.

Also Avraham a sus ojos i vido un karnero ke le veniya korryendo, ma el satan lo iva akosando (persigiendo) a tanto ke se le enramaron los kuernos entre las ramas de los arvoles; i kuando se soltava del arvol i kaminava un poko, tornava i se enramava, ve hen al ze a dereh (i ansina de este modo) fue azyendo munchas vezes. I de esto prevo Avraham ke este karnero se lo apronto el Santo Itbarah ayi  para ke lo ayegara en lugar de su ijo, i por esto lo tomo. Ke si no fuera esto no lo tomava, syendo sospechava kisas tyene patron i no akometiya de azer Korvan kon un karnero ke no es suyo. I dize la Mishna ke dito karnero fue kriado el diya de vyernes bein a shemashot ( entre los soles, kijo dizir entre el sol del diya i el sol de la noche shabath. Voz akodro ke esta dicha bein ashemashot dyo el titulo de un livro de Elie Wiesel, Entre deux soleils, syerro la paranteza) kuando se krio el mundo. Kyere dizir ke de estonses komando el Santo Itbarah ke se le aprontara un karnero a Avraham en la ora de la akeda, asigun avizimos en la perasha de Bereshit. Le disho el Santo Itbarah a Avraham: Kuando tanyiran tus ijos kon este modo de kuerno, les perdonaré pekados por zehut de la akeda, si es ke aran teshuva (arrepentimyento) kumplida.

Ansina vo eskapar mi emisyon de oy. El djueves ke vyene, si kyere el dyo, estaremos en 2014 i vo azer una rekapitulasyon de mis emisyones del anyo 2013, komo lo ago kada anyo. I el djueves de despues ke va kaer el 9 de janvier, penso ke kon lo ke keda de meldar vo pueder eskapar mi meldadura, ke me tendra tomado mueve semanas.

Al djueves i al anyo ke vyenen, si kyere el Dyo!

Edmond Cohen