Muestra Lingua: LOS DJUDYOS DE ETYOPIYA por Edmond Cohen

Amigos aki  vos do el teksto de la emisyon del progrma de radio Muestr Lingua de djueves 01 de avril, a las 4 06 pm, ora de Fransya.
 
El program se puede sintir por internet kada djueves, indo al sityo RADIO – la fréquence juive
Kale tener pasensya i asperar un poko, no se oye pishin.

Saludos a todos
Edmond Cohen Paris Fransya
Para Ladinokomunita

En djudeo-espanyol
leer en castellano

LOS DJUDYOS DE ETYOPIYA

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 15 de avril, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

El djueves pasado, en vez de avlarvos de la fyesta de Pesah ke estava vinyendo i en la kuala estamos, vos keriya avlar de los djudyos de Etyopiya, i el kastigo del tavan fue ke todo lo ke aviya aparejado sovre mi ordinador se dezasyo en supito kuando ize por yerro una manovra ke no kaliya.

Vos avli dunke de Pesah en vez de los Etyopyanos, i para oy me tomi el koraje de todo empesar por de muevo. Vos vo dunke avlar oy de unos de los ke yami en una de mis emisyones los djudyos partikolares, esta vez los de la Etyopiya.

Komo yamarlos ? Son konosidos komo falashas, ke en amhariko, la lingua de Etyopiya, kyere dizir egzilados o immigrados. Ama este byervo falashas es konsiderado komo pejorativo. Eyos se yaman entre eyos Bet Israel, la kaza de Israel. Parese siguro ke son israelitos. No es tan siguro ke son djudyos, i vos akodro ke ay una diferensya entre los dos byervos : todos los djudyos son israelitos, ama todos los israelitos no son djudyos. Los desendyentes de los dyez trivos pedridos del reyno de Israel son israelitos, ama no son djudyos, los djudyos, en ebreo yeudim, syendo los desendyentes de los ke moravan en el reyno de Yeuda, de aya el nombre yeudim.

Yo los vo yamar komo eyos se yaman, Beta Israel, i vaj a ver ke en vedra son muy partikolares . Kale saver ke la relijyon de los Beta Israel es bazada sovre livros relijyozos en la lingua guez, ke es la lingua sagrada de los Etyopyanos (ke son kristyanos, vos akodro). Konosen el humash (los sinko livros de la Tora) i, de manera mas jeneral el tanah, la Biblia, ama un tanah eskrito no en ebreo ama en guez a partir de la traduksyon en grego de la Biblia de los Setenta. En vedra el tanah de los Beta Israel se asemeja al vyejo testamento de los kristyanos, en el kual se topan unas kuantas kozas ke no ay en muestro tanah, komo los livros de Tobia, de Enoch, de Yeudith.

Ama no teniyan dingun konosimyento de la literatura rabinika, inkluyendo el Talmud…lo ke , de syerta manera i sovre este punto, los asemeja a los karaitos.

Kale ke vos diga del empesijo ke vos esto avlando agora de la relijyon de los Beta Israel, tal i komo era en Etyopiya. Ama komo ya lo savej, agora unos 80% de los Beta Israel biven en Israel, i las kozas trokaron aya. Ama dainda no estamos en esto, i yo vos avlo de los Beta Israel, komo eran en Etyopiya.

Los Bet Israel son tambyen partikolares en sus fyestas. Praktikan las fyestas del Humash: por egzemplo Pesah, Shavuot, ama el Shavuot del humash, el Shavuot de la segada (la moisson) no del Matan Tora, ke fyestamos en Shavuot vinyendo de los hahamim. A la rovez, no konosen Hanuka o Purim. Ama a la kontra, tyenen fyestas partikolares ke no tenemos, komo por egzemplo el sSgd, ke es djustamente el Matan Tora. Mozotros lo fyestamos en Shavuot, los Beta Israel lo fyestan al kavo de Heshvan. Suven todos en djuntos sovre una montanya, i es a la punta de la montanya ke se selebra esta fyesta yamada el Segd.

Los Bet Israel tyenen reglas de pureza muy duras : la mujer ke tyene su sangre se deve de kedar en una chosa de sangre. Si tyene un ijo se deve de kedarse 40 diyas en una chosa de nasimyento, i 80 si tyene una ija. Los ombres en karga de un entyerro deven kedarse izolados syete diyas i purifikarse antes de pueder aboltar a sus kazal, etc.

De ande salen estos Beta Israel tan partikolares ? En vedra, no se save dainda muy byen.

Los Beta Israel eyos mismo tyenen a lo manko dos tradisyones orales diferentes sovre sus orijen :

Asigun la primera tradisyon, los Beta Israel son los israelitos ke akompanyaron, a su retorno del reyno de Shelomo, el rey Menelik primero, ijo del rey Shelomo i de la reyna de Saba .

Asigun la sigunda tradisyon, los Bet Israel son los desendyentes del trivo de Dan, uno de los dyez trivos pedridos de Israel. Es esta tradisyon ke a sido adoptada por el gran rabinato sefaradi de Israel (OvadiaYosef) en 1973, ke se fundyo el mismo sovre varyos avizos de hahamim de al tyempo, i sovre todo sovre el Radbaz ( Rav David Ben Zimra) haham nasido en Espanya en 1462, ke a los trenta anyos fue echado de su pais i ke muryo en Safed (Erets Israel) a los 110 anyos de edad en 1572, despues de aver sido kapo del Beth Din de Fes, en el Maroko, i despues Haham bashi de Ayfton. El es ke eskrivyo, kuando era en Ayifton, ke era una koza sigura ke los Beta Israel eran los desendyentes del trivo de Dan, lo ke fue achetado, komo lo dishe, por Ovadya Yosef, Gran rabino sefaradi de Israel, i un anyo despues, en 1974, por Shlomo Goren, Gran rabino ashkenazi.

Ama ya entenditesh ke esta desizyon relijyoza desha entera la kuestyon istorika, kual ke sea la autoridad del Radbaz, ke bivyo unos 2.200 anyos despues de la deportasyon i dezaparisyon de los diez trivos.

Kualo saven los istoryanos ?

Se save  ke, asta el siglo V, aviya djudyos en Etyopiya. Ama estos djudyos paresen ser djudyos ordinaryos, si puedo dizir. Despues, entre el siglo V i el siglo XII, no se save nada porke no tenemos dingun eskrito. I, a partir del siglo XII, a la rovez los eskritos avlan de beta Israel i no avlan mas de djudyos ordinaryos. Un papaz kristyano del siglo XIV adopta la primera tradisyon ke vos dishe : los Beta Israel vinyeron kon Menelik primero, ijo de Shelomo i de la reyna de Saba.

Los istoryanos tyenen entonses dos ipotezas :

Primera ipoteza : los beta Israel son los desendyentes de los djudyos ordinaryos ke biviyan en Etyopiya, i se mesklaron por konversyon i kazamyentos mikstos a la povlasyon etyopyana, de tal manera ke el ADN de un Beta Israel no es diferente agora de un Etyopyano kristyano. Un embashador portugues eskrive en el siglo XVII ke los falashas, o djudyos, avlan ebreo, lo ke, komo vos dishe, no fue mas vedra despues, ama va kon la idea ke eran de orijen djudiya.

Sigunda ipoteza : los beta Israel seriyan de orijen kristyana, i guadraron solo el vyejo testamento de los kristyanos, i abandonaron el muevo.

Los istoryanos no syendo kapaches de provar una o otra de las dos ipotezas, por oy vamos a kedar sovre una interogasyon istorika, savyendo ke no ay interogasyon relijyoza : agora los Beta Israel son konsiderados komo israelitos del trivo de Dan.

Estos beta Israel biviyan al norte de la Etyopiya, lo ke se yaman agora el Gondar i el Tigre, serka de la frontera de la Eritrea .

En la Edad medya, aviya en estas rejyones del Norte varyos chikos reynos, i entre eyos unos de los beta Israel. Ama eran flakos kontra el Imperyo etyopyano ke se topava al sur i ke era kristyano. Este imperyo emprovesyo a los beta Israel dizyendo ke los ke no eran kristyanos no puediyan eredar de la tyerra , i veniya a ser falasi, sin tyerra suya.

En 1624, todo el norte es konkistado por el Imperyo kristyano del sur. La situasyon de los beta Israel se va azer muy prove, kazalinos sin tyerra, lavorando komo syervos, i unos kuantos artezanos, sovre todo para el lavoro del fyerro i de la tyerra kocha . Biven  izolados de los kristyanos, en sus kazales.

En el empesijo del siglo XIX, los protestantes inglezes embiyan misyonaryos para konvertir  los beta Israel al kristyanismo. Para luchar kontra esto, los djudyos de Fransya, kon la Alliance Israelite Universelle, la kuala, komo lo konti ay tres semanas de esto, avlando del kavzo Mortara, fue fundada en 1860, embiyan a Joseph Halevy en 1867 en Etyopiya. El aze un raporto muy favoravle, prekonizando de fraguar eskolas i de embiyar lo mas muncho de beta Israel en Erets (no avli de este Halevy kuando ize mi emisyon sovre los  prekursores del syonismo, es kulpa de mi parte).

Entre 1888 i 1892, los beta Israel sufrieron muncho kon ambre, kon epidemias, kon invazyon del Mahdi venido del Sudan (este Mahdi ke konosimos un poko kon el filmo Khartoum, ke salyo en 1966 kon Charlton Heston, i Laurence Olivier en el rolo del Mahdi). Munchos se muryeron i esta

 epoka se yama los Negros Diyas.

De muevo en 1904, un franses,  elevo de Joseph Halevy, Jacques Faitlovitch, se va a azer un estudyo de estos beta Israel, ke konsidera komo djudyos partikolares, aze fraguar eskolas, i forma una elita oksidentalizada kon el eskopo de aserkar los beta Israel de los otros djudyos.

Al lado de los beta Israel egzisten pretos, yamados baryas, ke fueron syervos konvertidos a la relijyon de los beta Israel, ke eyos nunka se konsideraron komo pretos.

Kuando se kree el estado de Israel, la ley del ritorno no se aplika a los beta Israel, syendo ke, komo lo dishe, solo fueron konsiderados en 1973 i 1974 komo djudyos por los hahamim del estado.

Ama en este mismo tyempo, afita en Etyopiya un putsch komunisto ke echa afuera el rey Haile Selassie i toma el poder, kon Mengistu komo kapo. Este Mengistu va ser yamado el Negus kolorado porke va matar por ambre o por balas a mas de 100.000 personas. Va pedrer el poder en 1991 i ser kondenado a muerte en 2008, ama sin efekto porke se fuyo ande su amigo Mugabe en el Zimbabwe, ande bive agora.

Esta epoka Mengistu va ser de muevo muy negros diyas para los beta Israel ke van de muevo, i no solo eyos, sufrir de ambre i de gerra sivil. Los ke pueden se fuyen en el Sudan al oeste. Los otros se van a esforsar de fuirse verso Israel.

Komo ya lo dishe, asta 1973 aviya pokos beta Israel en Israel, syendo ke no eran rekonosidos komo djudyos. A partir del momento ande los kapos hahamim de Israel los rekononosyeron komo djudyos, dunke en 1973 1 1974, las kozas van a empesar de trokar : en 1975, el governo de Rabin los da ofisyalmente derecho a la ley del ritorno…salvo ke en el mismo tyempo el governo etyopyano, komunisto, de Mengistu, impide toda emigrasyon de los beta Israel.

En 1977, 120 beta Israel pueden salir de Etyopiya para Israel kon un akodro sekreto de vendita de armas al muevo governo. Ama la koza se save, i el akodro es serrado por la Etyopiya.

Entre 1980 i 1984, munchos Etyopyanos del norte, entre los kualos ay beta Israel, fuyen la gerra sivil  en indosen en el sur del Sudan. Del Sudan, unos 6.600 beta Israel reushen, mas o menos a eskondidas, de fuyir del Sudan para Israel.

Entre 1984 i 1985, ay una ambre terrivle en Etyopiya, kon miles de muertos ; Unos 3 a 4.000 beta Israel mueren en esta epoka. Israel , en una operasyon Moshe entre el 20 novyembre 1984 i el 4 de janvier 1985 aze entrar en Israel 6.500 personas. Unas kuantas semanas despues, los Amerikanos ayegan a azer fuir otros 650 personas.

En 1990-1991, otros 6.000 beta Israel pueden entrar en Israel. Los otros, fuyendo la gerra sivil, se van a Addis Abeba, en kampos. I en 1991, kuando kae el governo komunisto kon Mengistu, los 14.300 beta Israel ke se topan en estos kampos son yevados en dos diyas en Israel por un ponte aereo : 34 bueltas de avyones de El Al, sin siyas para pueder tomar mas djente. S

e yama la operasyon Shelomo, ke vale a la kompaniya El Al el rekord de djente yevada en un solo avyon : 1087 personas en un boeing 747.

Israel pensava ke la kaji totalidad de los djudyos de Etyopiya eran salvados i en Israel, ama empesaron a venir en Adis Abeba otros, yamados los Falash Muras. Kyen son estos Falash Muras ? Son Etypyanos ke no son beta Israel, ama ke yene kyeren irse en Israel. En jeneral son kristyanos, ama konvertidos i asigun eyos, son komo marranos ke en sekreto se kedaron beta Israel, ke se kazan solo entre eyos i no kon otros kristyanos. Ay tambyen halizes kristyanos ke dizen mintiras para pueder fuir la Etyopiya, komo este ijiko kristyano del filmo Va vis et deviens (Live and become), ke se aze pasar por djudyo para pueder fuir en Israel Asta agora, el governo de Israel no se amostro muy voluntaryo para achetarlos, ama desde este anyo, ya empeso una aliya de los Falash Muras tambyen. Son unos 20.000 ke asperan en los kampos serka de Adis Abeba.

Kon la venida de los beta Israel en Israel, todo lo ke vos dishe asta agora se esta trokando. Afillu si los Beta Israel aprovan de guadrar lo mas ke pueden de sus tradisyones i de sus partikolaridades, es siguro ke no es kolay para eyos de toparse en un pais ande todos son djudyos i avlan en lashon, un pais ande la djente bive en sivdades i no en kazales, ande la djente es blanka kuando eyos, ke no se sintiyan pretos, se apersiven ke los otros los ven pretos.

Komo syempre, ay agora una diferensya entre las jenerasyones, los vyejos ke no pueden o no kyeren trokar, i los mansevos, indimas los ke nasyeron en Israel, ke se fueron en las eskolas del pais, ke avlan ebreo i ke sigen mas i mas la relijyon djudiya i no la relijyon de los beta Israel. Esto dicho, ay tambyen algunos mansevos ke kyeren guadrar sus partikolaridades, i mismo se aunen a movimyentos pretos de Amerika.

Israel es un pais ande ay milyon i medyo de arabos , ande ay djudyos de Etyopiya, del Yemen, de Rusiya, de Amerika, i esto todo no se puede azer un puevlo uniko en una sola jenerasyon. I de toda manera, no se si seriya tan bueno ke todos se olviden lo ke son. Komo dize muestro profesor Haïm Vidal Sephiha, kada uno kon su djiz i kon su shishit !

Astal djueves ke vyene, si kyere el Dyo