Las Notas de Matilda – Kantadores de la tradisión djudeo-espanyola: Avraham Perera

Kada martes, Matilda mos kontara sovre los kantadores y kantadoras de la muestra muzika.
Los tekstos ke kompartimos koresponden a los programas de la seksion en ladino de Kol Israel del siklo ke eya mizma melda kada djueves

Avraham Perera
(Yerushaláyim 1934 – 1984)

Avraham Perera nasió i kresió en Yerushaláim en el kartié sefaradí de «Abu Básal», ande absorbió las valores del kanto de la orasión i de los inmos sakros, i del kanto en ladino, ke después de anyos kantó él mizmo i enrejistró. En la eskola elementar del kartié de Bet Hakérem estudió múzika, i se ambezó sovre todo los kantes patriótikos.
Su padre Aharón Perera, ke era shoför del «Hamekasher», kayó en el 1948 en el atako de los árabos al konvolyo para la Hadasa en el Monte Skopus. Este trájiko evenimiento kavzó en la famiya una kriza espiritual i ekonómika muy fuerte.
Avraham Perera se aroló a la armada i sólo por un kavzo fue «deskuvierto» komo kantante talentuozo por Mordehay Primán, ke lo enkorajó a formar un grupo muzikal kon Beny Amdorsky i Israel Gorión, ke empesó a produizirse en Yerushaláyim kon sukseso. Kuando sus dos kompanyos dechizaron de establesersen en Tel-Aviv, Avraham deskojó de kedarse en Yerushaláyim.
El lavorava komo mekanisién en el «Mekasher» i estudiava kanto en la Akademia de Múzika. Kuando le fue propozada una beka para estudiar kanto en «La Scala» de Milano, él refuzó, para no  despartirse de Yerushaláyim.
El kantó kantes en ebreo i en otras lingua kon los miembros de la Lahakat Hatavlinim,  partisipó a munchas enrejistrasiones públikas para la Radio, i kantó en kibutzim i delantre de los soldados. En el 1965 Avraham kantó en el Festival del Kanto Israelí», i la kantiga ke kantó – «Rakefet»-  se kanta asta agora.
En el 1972 él partisipó a la komedia muzikal «No me yames preto».
Kon su piédrita en el 1984, el kanto en ladino pedrió un grande i irremplasable interpret.

Ver video en eSefarad: Avraham Perera: Adon haSelijot, El Nora Alila, Yendome para Marsilia 

«Adio kerida», kantada por Avraham Perera