Kreada ensima de una laguna, esta sivdad unika en el mundo parami fue i es el lugar ke me gustariya de bivir despues de mi eksperyensa de vida de 27 anyos ke pasi en la Suissa, vijitando kaji toda la Evropa. No vos digo la ermozura de la natura, su klima ke parese al de Estambol, la amabilidad de sus abitantes, su arkitektura gotik medyevala bien mentenida, sus muzeos, sus teatros, sus salas de konserto, su kultura espesial, uno de los sentros de la muzika klasika barok i sovre todo sus kanales onde las góndolas van i vienen sin mesklarsen a los motoskafos (embarkasyon) de transporto. Adjustare a esto ke el saverisyo i la fabrikasyon del kristal de los venezianos es famozo en el mundo, la izla de Murano siendo su sentro prinsipal.
La peryoda del siglo 15 al siglo 18 Venezia dirijada por losdogesfue la kapitala del komersyo evropeo i sovre todo lo ke izo su grandeza fue el komersyo kon el Levante a saver el Imperio Otomano i las Indias. Los doges fueron los dirijentes supremos elijidos a vida por la aristokrasiya novle de la Republika, politikamente poderozos, ma kontrolados, responsavles de la superioridad marítima en el Mediteraneo de la marina veneziana entre los anyos 726 a 1797.
Los sefaradís fueron los primeros a kerer vinir a bivir en la sivdad, ma el Governo veniziano ardor katoliko se opozo a ke los ekspulsados djudyos i los maranos vengan a establesersen en sus tyerras. Ma uno de los primeros ke fue kapache de estar por una peryoda kurta fue Don Isaac Abravanel (1437-1508) ke arivo de la izla Korfu en 1503. Ma la situasyon troko en el anyo 1509 kuando los sefaradim i los eshkenazim, los kualos eran yamados, tedeschi, visto la gerra de la Liga de Cambrai, para poder salvarlos fueron achetados a ke bivan en la sivdad a kondisyon de ser instalados en una izla yamada ‘Gueto nuovo’ (geto muevo) entornada de muraya, onde la noche era defendido de salir. Los djudyos pudiyan komo ofisyo solo emprestar dinero o vender ropas de okazyon.
El komersyo kon el Levante era kontrolado por una chika minoridad de abitantes fin a el anyo 1524 al kual en baza de resiprosidad establesida kon los otomanos fue permetido a los djudyos de Salonik, de Estambol i de Izmir a vinir a establesersen en la sivdad. Ansi el komersyo kon el Levante tomo grandes proporsyones enrikesyendo los sefaradim levantinos koza ke fue mal visto por los otoktones. Malgrado esto el Senato defendyo la prezensya djudiya i mizmo akordo a la komunidad muevos lugares onde bivir. Grasias a esta situasyon munchos djudyos españyoles i maranos toparon el remedyo de ir a Estambol, estar poko tiempo i tornar a Venezia komo djudyos levantinos otomanos. Este trafiko fue eskapado kuando el doge Leonardo Dona en 1608 permetyo a ke los maranos tornen al djudaizmo i moren en el geto al lugar de bivir al seno del puevlo katoliko.
Dezde 1589 Venezia ke rekonosyo a los djudyos del Ponant (sefaradim establesidos en sivdades evropeas i amerikanas) el derecho de bivir i lavorar en la sivdad i kon el dekreto del governo eyos fueron protejados kontra todo modo de akuzo de erezia. Las miembros del grupo los ‘Savii’ los kualos dechizavan de las leyes de merkansiya del payiz vieron a la dekadensya del komersyo internasyonal ke el elemento djudyo era muy importante. Venezia rekonosyo ansi los eshkenazim, los sefaradim levantinos i los sefaradim del Ponant de ser liberos de vinir a establesersen en la sivdad.
Los sefaradim del Ponant komo los del Levante fraguaron sus sinagogas al seno del geto i eyas fueron el sentro de las organizasyones komunitaryas. La djenerozidad i la vitalidad de estas dos komunidades una al lado de la otra, se manifestaron a traverso de asosiasyones de ermandad para ayudar a los povres, a vijitar i ayudar a los hazinos, a okuparsen de los guerfanos i de dotar a la ijikas povres de un ashuguar. En despartes se publikaron livros en portuges, en espanyol al lado de los de ebreo. La regla era de mirar a ayudar los konversos ke tornavan al djudaizmo i ke no konosiyan el ebreo de pueder meldar i entender los livros de orasyon. La primera Agada de pesah eskrita en karakteres latinos fue editada en 1620 a este buto.
Munchos djudyos de valor arivando de la península iberika bivieron en Venezia en el siglo16 tal Salamon Usque eskrivano renomado ke avia eskrito la piesa de teatro ‘Ester’, el kabalisto Salamon Molcho, el selebro doktor Amatus Lusitanus, Jozef Nasi i sus 2 tiyas Dona Gracia i Dona Brianda onde sus aktividades avian echo bastante bruido en Evropa. El rabino Samuel Aboab nasido de Hamburg ke bivyo 40 anyos en Venezia entre 1650 i 1690 era muy renomado i es el ke fue el kritiko del Sabetaizmo kuando Nathan de Gaza vijito la sivdad. El kabalisto poeta Moses Zacuto ke bivyo 29 anyos en Venezia el kual es konosido kon su ovra ‘Tophet Aruh’. La figura la mas importante fue el doktor Isaac Cardoso (1604-1683) eskrivano ke avia eskrito los mijores tekstos de apolojia djudiya ‘Las ekselensyas de los Ebreos’.
La lista de los personajes importantes djudyos ke bivieron en Venezia es bastante larga, aki miri de darvos una idea sovre la prezensya sefaradí en esta sivdad ke domino siglos el lado oeste de la Adriatika.
eSefarad Noticias del Mundo Sefaradi
