eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avla en esta seksion sovre distintos temas ke tokan a la istoria i a la kultura sefaradi.
LOS MEDIKOS DJUDIOS EN LA ESKOLA DE MEDISINA MILITARA DURANTE EL IMPERIO OTOMANO
Un dia, vijitando la Eskola de Medisina Militara, en Estambol, el Sultan Abdul Medjid se dio kuento ke avia ayi elevos de todas las relijiones a la eksepsion de djudios. Kedando muy kuriozo el demando al direktor de la eskola kuala es la razon de esto. El direktor le respondio enumerando las razones por las kualas no venian a estudiar djudios a la eskola de medisina:
Primeramente porke eyos no komen komidas aprontadas por non djudios i segundamente porke deven azer sus orasiones kada demanyana, ma no tienen un rabino ni ande azer las tefilot.
El Sultan Abdul Medjid, ke no savia asta akel momento de kualo se tratava, ordeno pishin de avrir en la eskola una kuzina kasher i engajar un gizandon i un shohet, ke se okuparan de mantener los preseptos del gizado segun lo enkomenda la ley.
El Sultan ordeno tambien de engajar un rabino ke organizara las orasiones diarias en la eskola i ademas demando del direktor de liberar a los elevos djudios de dia de viernes, afin ke puedan azer el Shabat en sus kazas…..
De entre los medikos djudios ke terminaron sus estudios en la Fakultad de Medisina, segun fue yamada mas tadre, i ke yegaron a altos postos en la armada otomana mensionaremos algunos de eyos:
El vise amrial, Dr. Isaac Pasha Molho; el kontra amiral, Dr. Mentesh (Marko) Pasha Galimidi; el jeneral de brigada, Dr. Isaac Pasha Hadjes; el kolonel, Dr. Rapahel Bey Dalmedico, i la lista es ainda larga.
Todos estos medikos i otros mas fueron muy apresiados por sus komandantes kontinuando ansi la larga tradision de medikos djudios al servisio de los Sultanes.
Aki unos kuantos refranes sovre medikos:
- Ande no ay mediko no bivas
- El Dio mos guadre de medio bovo i medio mediko
- Yerros de los medikos la tierra los kuvre
- I no mos olvidaremos a muestro Dr. de Matasanos
El artikolo kompleto esta en el No. 90 de la revista Aki Yerushalayim.
A los amigos ke kereran abonarsen a la revista de embiar mail a: zeldao@netvision.net.il
Zelda Ovadia
Para Ladinokomunita
