eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar de “LOS KALES DEL BOSFOR”, los desparesidos i los aktuales, a lo largo de las kostas del Bosfor, el estrecho ke konekta la Mar Marmara kon la Mar Preta.
LOS KALES DE LA KOSTA ASIATIKA DEL BOSFOR
El gran viajador turko Evliya Çelebi avia eskrito en sus diarios ke en 1625 ya existia en Üsküdar un kuartier djudio. Ma de investigasiones ke fueron echas sovresale ke siglos atras ya avian chikas komunidades djudias en Baglarbashi, Beykoz i Kuzgundjuk. En las primeras lokalidades no kedaron trasas de djudios ma en Kuzgundjuk de la kuala avlaremos mas anchamente se avia kreado una komunidad ke era aktiva ainda asta los anyos 60 i los prinsipios de los anyos 70 del siglo 20.
Se pensa ke los djudios ke se avian aresentado en esta kosta del Bosfor, en las lokalidades , ke mensioni mas ariva, son los ke avian fuyido del kuartier de Galata en segito a una epidemia de pesta ke avia desbrochado en la sivdad, en 1618.Unos 200 anyos mas tadre, el Konde de Andreossy ke vijito Estambol, eskrivio en sus rekuerdos ke a la vista los djudios de Balat, a la oriya del Kuerno de Oro (Haliç),ke avian salvado de otra epidemia de pesta, en 1812, avian pasado a bivir en ?sküdar. El mas antiguo dokumento sovre este kuartier ke fue topado en los rejistros del Gran Rabinato, es el de la boda del Dr. Mordehay Kordovero i Luna Fresko, lo ke indika klaramente de la existensia de una sinagoga ayi.
En segito a un fuego ke avia desbrochado en el anyo 1921, en el kuartier djudio de ?sküdar, 164 kazas, la sinagoga i la eskola djudia fueron kemadas. Los ke se avian salvado de este fuego pasaron a bivir a las lokalidades de Haydarpasha (de la sinagoga de Haydarpasha ya trati en el primer artikolo de esta seria) i Kuzguncuk..
La lokalidad de Kuzguncuk, yamada en el pasado Bellavista por los djudios d’Estambol, era konsiderada komo la ultima eskala antes de yegar a la Tierra Santa, o sea , vinir a Yerushalayim i ser enterrados en el Monte de los Olivos. Este era el dezeo de munchos djudios, ma no todos tenian la posibilidad materiala de poder pagar un semejante viaje. Entonses eyos se aresentavan en Kuzguncuk, konsintiendosen, de sus punto de vista, muy serka a la Sivdad Santa, i en sus testamento demandavan de ser enterrados en esta lokalidad. En Kuzguncuk se topa tambien uno de los mas antiguos simeterios djudios de Estambol.
La primera sinagoga de Kuzguncuk, Bet Yaakov, o kon su otro nombre Kal de Abasho, fue fraguada en este kuartier en 1878. El tavan (techo) fue ilustrado kon motivos de la Biblia i en su kortijo avia dos midrashim para la ensenyansa de la Tora.
De mizmo ke en otras lokalidades de Estambol, aki tambien kon la mengua de la povlasion djudia, devido a movimientos demografikos, la sinagoga kaji ke kedo sin yehidim. Grasias a esforsos echos por los kuzgundjuklis veteranos ke reusheron a atrayer al kal Bet Yaakov las muevas jenerasiones, a sus ijos i inyetos, ke el esta kontinuando a dar servisios en los dias de Shabat i las fiestas. En el ultimo mez de Septembre tuvo lugar en el kal Bet Yaakov una seremonia de Viola a la kuala partisiparon una muchidumbre de djente.
El otro kal de Kuzguncuk es el Kal de Ariva o kon su otro nombre Virane. Despues ke el fue serrado por falta de djudios, el konosido atlet de su epoka, ke era miembros del Klub de Spor Kuzguncuk, Eliezer Hara, iva, el solo, al kal Virane i aze sus tefilot, sus orasiones afin ke kede aktivo.. En 1980 el fue reparado i avierto de muevo a los servisios de los kuzgundjuklis kon una modesta seremonia.
El ultimo kal ke mensionaremos en esta seria es el kal de Caddebostan. Esta sinagoga fue konstruida en 1953 en segito a la puja de los djudios ke pasaron a morar ayi de manera permanente.
Oganyo tuvieron lugar ayi las tefilot (orasiones) de Selihot a las kualas partisiparon el Gran Rabino de Turkia Rav Isak Haleva, miembros del Bet Din i un grande numero de korelijionarios. Este kal es muy aktivo i ayi tienen lugar seremonias de Bar Mitsva i otras, ansi ke son markadas las fiestas kon muncha alegria, segun fue el kavzo en la fiesta de Hanuka ke selebrimos kurto tiempo atras.
Caddebostan ke se topa en la kosta asiatika de la Mar Marmara, es dotada kon plajes de las mas ermozas de la sivdad i era muy apresiada komo lugar de rekreasion i de vakansas por los sivadadinos de Estambol.
