Los Eskritos de Zelda: LOS KALES D’ESTAMBOL: LA SINAGOGA NEVE SHALOM

Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar de “LOS KALES DEL BOSFOR”,   los desparesidos i los aktuales, a lo largo de las kostas del Bosfor, el estrecho ke konekta la Mar Marmara kon la Mar Preta.

  
 

LA SINAGOGA NEVE SHALOM

La sinagoga Neve Shalom la mas grande i konosida de entre las sinagogas de Estambol fue fraguada, segun los fue el kavzo kon otras sinagogas mas, en segito a la rapida puja de la povlasion djudia en jeneral i de la sefaradi mas partikularmente, en los kuartieres de Galata i Beyoglu.

Los kales ke ya existian de antes – Kneset Apollon en la kaye Buyuk Hendek, en la kuala se topa oy el Neve Shalom, i el kal Zulfaris en Karakoy, ya no estavan mas respondiendo a los menesteres de esta povlasion.

Esto se konsintio prinsipalmente en las fiestas de Rosh Ashana, Kipur i Pesah, en las kualas la mayoria de los djudios kumplen sus doveres relijozos. Por falta de kales se alkilavan salas ke se transformavan en «kales» permanentes.

En 1938, el Prezidente de la komunidad djudia de Estambol, Marsel Franko, desidio de transformar la una de las dos eskolas djudias ke se topavan en akeya epoka en Galata, en sinagoga. Kon grandes esforsos Franko reusho a terminar todos los trokamientos i en el 26 de Septembre de este mizmo anyo, la vilya de Rosh Ashana, avrio la «mueva» sinagoga a la povlasion djudia de Estambol para las orasiones de los Dias Temerozos.

Ma de un parte, kuando Marsel Franko estava siendo felisitado por sus korelijionarios, de la otra, su inisiativa de transformar la eskola en kal yego a los oyidos de las autoridades.

El mayor de Estambol, embiando un akavidamiento al Komite Exekutivo de la komunidad djudia, demando de serrar el kal i retornar el edifisio a su estado anterior. Marsel Franko fue ovligado de demisionar de sus funksiones.

Aun ke la eskola torno a kumplir sus funksiones komo institusion edukativa, la una de sus salas kontinuo a servir de kal. Un  viejo almario sirvio de eihal para los Sifrei Tora, i las siyas eran alkiladas del kafe «Sari Madam», situado muy serka de la eskola. Segun rejistros, en esta sala tuvo lugar la boda de Avram, ijo de Yaakov Morel i Klara, ija de Yuda Alaluf, el 14 de Marso 1948.

En segito a la presion echa por la komunidad djudia de la sivdad, el Komite Exekutivo tomo la desizion de dar un nombre a esta sala. En fin el 24 de Avril 1948, primer dia de Pesah, eya fue yamada Neve Shalom. En este mizmo dia fue desidido tambien ke la mueva sinagoga ke sera konstruida ayi yevara este mizmo nombre.

Un anyo mas tadre, en el mez de Djulio 1949 fueron resividos los permisos de kontruksion despues de lo kualo fue formada imediatamente una komision enkargada del muevo proyekto. Los  miembros de la komision se adresaron al muy famozo  arkitekto italiano Denari, ke dientro un muy kurto tiempo les prezento un plano de lavoro. Ma, en akeya mizma epoka, dos djoven arkitektos djudios ke avian terminado sus estudios en la Universidad Teknika de Estambol, Eli Ventura i Bernard Motola, ke se adresaron eyos tambien komo kandidatos para la konstruksion de la sinagoga, pretendiendo ke un semejante proyekto deve ser realizado kon muncho sentimiento i demandaron de darles una shans. Los dos djovenes, kon sus obstinasion, reusheron a konvenser a los miembros de la komision i despues de un lavoro muy metikulozo eyos prezentaron la maket de la sinagoga al Komite Exekutivo ke akseptaron  sus proyekto  a la unanimidad.

Se supoza ke la sinagoga Neve Shalom fue fraguada en el mizmo lugar onde se topava el kal Aragon konstruido por los djudios ekspulsados de Espanya. Su konstruksion kosto 300.000 liras turkas, suma konsiderada para akeya epoka, komo astronomika.

A la seremonia de aviertura de la sinagoga, ke tuvolugar el 25 de Marso 1951, avian partisipado los lideres de la komunidad djudia ansi ke el rav Refael Saban, elijido mas tadre komo Gran Rabino de Turkia, miembros del Bet Din, reprezentantes de la prensa djudia i una muchidumbre de korelijionarios de la sivdad. La seremonia fue avierta kon la orasion «Baruh ‘Haba beShem Adonay» – Seash bienvenidos a nombre de Adonay por el famozo hazan, Izak Machorro, de Bendicha Memoria.

En esta sinagoga tienen lugar kada anyo diezenas de bodas, seremonias de Bar Mitsva i Brit Mila i naturalmente la selebrasion de las fiestas ansi ke seremonias funebres. i fue testigo a munchos evenimientos importantes.

Ma el Neve Shalom, malorozamente fue testigo tambien a tres evenimientos de atakos teroristas.

El primer i mas estremesiente  de entre  eyos akontesio el 6 de Septembre 1986, durante el kual 23 djudios fueron asasinados aziendo las orasiones de Shabat demanyana, kon los taletes sovre sus ombros i los livros de tefila en sus manos. Este terrible atako fue un fuerte golpe para la komunidad djudia de Estambol ke paso dias de dolor i dolio.

Un segundo atako terorista al kal tuvo lugar el 1 de Marso 1992, ke por muncha suerte se termino sin viktimas i sin danyos en bienes. Solamente tres dias despues de este atako fueron markados en la sinagoga Neve Shalom los 500 anyos de la Ekspulsion de los djduios de Espanya i de sus aresentamiento en tierras del Imperio Otomano. Durante la seremonia fue meldada una orasion espesiala en sinyo de agradesimiento al puevlo turko por avrir sus brasos i resivir a estos djudios ekspulsados de Espanya.

El 15 de Noviembre 2003 la sinagoga Neve Shalom fue testigo a un treser atako terorista durante el kual 6 de muestros korelijionaros toparon sus muerte.

Esperemos ke de agora endelantre el Neve Shalom i todos los kales de Estambol konoseran solo bodas i alegrias, Amen.

Kon este artikolo sovre el kal Neve Shalom, renomado por las bodas tan ermozas i somptuozas ke tienen lugar ayi,  se termina tambien la seria «Kales de Estambol».