eSefarad Noticias del Mundo Sefaradi
Ver todos los artículos de esta sección
Rachel Luzatto
Una otra figura muy interesante del djudaizmo sefaradi de Italia es la de Rachel Luzzatto ke nasio en 1790 e la sivdad de Trieste. Siendo ke su famiya era muy relijioza eya fue edukada en kaza, djuntos kon su ermano David i su primo Samuel David Luzzatto, ke devino una de las figuras mas importantes de la literatura ebrea, konosido kon el pseodonimo “Shadal”. El fue el ke enfluenso a Rachel a interesarse i amar los estudios sovre el djudaizmo en jeneral i la poezia ebrea mas partikularmente.
Malgrado la fuerte opozision de su famiya, en 1819, a la edad 29 anyos, Rachel auno su vida a la de Jacob Morpurgo, ombre de negosios nasido en Austria, ke era de orijin eshkenazi.
Eya dediko su vida a servir a su marido, aun ke el no apoyo su aktividad literaria i tambien a kudyar a sus kuatro kriaturas. Es solamente tadre en la noche ke Rachel tenia el tiempo de eskrivir sus poemas.
En 1847, 30 anyos despues de sus primeros pasos en el kampo poetiko, Shadal publiko sus poemas i los de Rachel Luzzatto Morpugo en la revista ‘Kohavei Yitshak’ (Las estreyas de Yitshak)dedikada a la literatura ebrea moderna. Mizmo su marido kedo entusiazmado del rekonosimiento del kual gozo su mujer por su talento poetiko. Algunos de sus lektores refuzaron de akseptar sus poemas en ebreo ke fueron eskritos por una mujer; otros la alavaron por su kapachidad de superar las aktividades diarias ke okupan una mujer kazada i madre de kreaturas i de topar el tiempo para dedikarse a lo ke eya mas amava: la literatura i la poezia ebrea moderna.
Fuente: turkisrael.org
Zelda Ovadia Salinas, espesialista en lengua djudeo-espanyola, mos avla en esta seksion sovre distintos temas ke tokan a la istoria i a la kultura sefaradi.
