LOS DJUDIOS DE BUKHARA por Shimon Geron

A los djudios ke biven en los Caucases, los yaman djudios de Bukhara i son desendientes de las Komunidades Judias espandidas en munchas partes de la Asia. Una parte grande de esta region se topa en UZBEKISTAN i kaie dentro BUKHARA, TASHKENT, SAMARKAND i SHACHRISBEZ. Ensima de esto hay la Komunidad de DUSHNEVAN la Kapital de TAJIKISTAN i BISHKEK la Kapital de KYRGYZTAN. Hay ke disen ke todas estas Komunidades se van atras al Primer BEIT HAMIKDASH.

SANCHERIV el Rey de ASHUR tomo a los 10 tribus de Israel i los yevo al otro lado del RIO GOZEN. No se puede saber si es justo o no, ma los djudios vivieron en esta region antes del primer exilio i del Segundo Beit Hamikdash. Mismo despues ke el Rey de la Persia KORESH dio si permiso ke se tornen los djudios a Israel para rekonstruir el Templo, munchos se kedaron en Persia. Mas tarde kuando se toparon perseguidos munchos inmigraron al norte a la Asia Sentral. Es possible ke son eyos los ansestros de los djudios de Bukhara.

En un tiempo obskuro en la Era Mediana, en el Siglo 7, ISLAM empezo a konkistar el Kontinente Asiatiko i los musulmanos tomaron a Bukhara. Los djudios ke resistieron de ser konvertidos, resibieron una statua inferior ke era el «DHIMMI» kon un respekto limitado i una sierta proteksion. Ansi los djudios vivieron en paz i estabilidad basho los Regimes Islamikos.Se exigia solamente ke pagen taxas grandes komo el «JIZIA» i la soma se desidia por los dirijentes del pais. Era obligatorio ke kada Judio lo page.

En 4979 las armadas de Mongolia basho «GENGHIS KHAN» yegaron a la Asia Sentrala konkistando la Region de los Caucases ke kontenian tambien a Irak, Iran i partes de la Russia de hoy. Eran muy kruel komo soldados i derokaron a todas las sivdades ke kaian en sus kaminos i kemaron todo. Los djudios de Bukhara sufriyeron muncho i fue despues de 80 anios ke todo se rekonstruio basho el dirijente»TIMOR LANG». El era el ansestro original del Pueblo Uzbek. Del otro lado era uno ke rekonstruia i destruia sivdades i enkojaba a los djudios ke se tornen atras. Munchos djudios venian de Persia i trusheron kon eyos una sabidura de textiles i les ayudo a vivir bueno.

Mismo si los djudios se tornaron a Bukhara no eran konsiderados igual a otros. Tenian ke meter vestidos de kolor preto i amarilyo o un chapeo para ke se vea ke eran djudios. Tenian ke vivir en un barrio separado ke se yamaba «Mahalle Yehudion» i no puedian salir fuera de ayi. Las kasas eran konstruidas de manera ke permetian tener negosios. Esto signifikaba ke las kasas de los djudios eran menos altas i ke el kommersio apartenia a eyos. La statua de DHIMMI se apliko de muevo i tenian ke pagar el JIZIA. Esto fue un golpe para los djudios. Si no pagaban sus taksas resibian la pena de la muerte.

En los proksimos 1000 anios. en tiempos diferentes los djudios tuvieron tiempos kalmos i tiempos de sufrimiento. Mismo asi la Komunidad se enfloresio. Tenian un grande «Beit Knesset» ke servio a la Komunidad por 500 anios. No tenian mas ke un lugar para azer sus orasiones porke los musulmanos no lo permetian. Habian difikultades geografikas i por esta razon, no tenian un kontakto kon otras Komunidades Djudias en el mundo. Por finir estas komunidades se aflakaron i se pedrieron. Fue un problem mas grande kuando las nasiones de la Asia Sentral se hizieron SUNNIS i kortaron el kontakto kon la Persia ke eran SHIITES. Los djudios no tenian uno en la kabeza para prevenir este malor. El fin vino kon la Proselytizasion Musulmana ke forzo a los djudios de konvertirsen. Les daban la pena de la muerte si los topaban praktikando el djudaismo en sekreto. A los ANUSIM los yamaban «CHALE» ke en la lingua TAJIK kieria desir «NI DE AKI NI DE AYI -NI MUSULMANO NI DJUDIO-. En vedra no los kierian a los djudios i los djudios no kierian integrarlos para no aflakar la religion. Por finir se avrio una KEHILA DE ANUSIM separada.

En 5553 un SHALIAH de Israel vino a Bukhara de TIBERIA. Era el Rabino «Yosef Maman Mugrabi» un eskolar sefaradi. Vino para arekojer fondos para los proves de Israel. Lo ke topo ayi fue un choke grande. Ansi el se dio a rejuvenar el estado espiritual de los djudios ayi. Les ambezo la ALAHA i los ato a la MESORAH SEFARADITA. El Rabino se kedo ayi i dirijio la Komunidad por unas kuantas dekadas. Trusho MELAMDIM para edukar a las kriaturas. Ademas los enkorajo a irsen a Israel i munchos se fueron ayi a Yerushalayim kreando un kuartier de djudios de Bukhara. Durante este tiempo un otro Rabbno de TEIMAN -Yemen- vino ayi i se yamaba «Zecharia Matsliah». Este ombre no pensaba ke era djusto de ambezar una otra forma del djudaismo komo el de los Sefaradim. Valia mas ke sean readoptados a los MINHAGIM i la MESORAH de la Komunidad Persa, viniendo de ayi. El resultado fue ke hubo una rompedura en la Kehila. En mismo tiempo se avrio una YESHIVA i un BEIT MIDRASH en Bukhara.

En el Siglo 19, la komunidad se espandio,k uando la autoridad musulmana desho a los djudios ke vivan afuera de la MAHALE YEHUDION. Kon esto mas i mas djudios se fueron a Bukhara. Al fin del Siglo 19, la Rusia konkisto partes grandes de Asia del Este. Esto se torno kontra los djudios i akusavan a los djudios de ayudar a los rusos. Munchos se fueron a TASHKENT, SAMARKAND i a otros lugares. En poko tiempo los rusos esta vez dieron dekretos antisemitas en una kompetision kon los komersantes rusos i djudios. Por finir echaron afuera a los djudios de Bukhara. Ma este dekreto no se kedo en fuerza por muncho tiempo.

Al empesijo del Siglo 20, kon la konstruksion de la linya de treno del «TRANS CASPIAN» todas las difikultades geografikas disminueron. Se puedia viajar agora al Medio Oriente i a Israel. En el invierno de 5683 la Revolusion Bolshevika reusho a tomar a los paizes de esta region. Anunsaron la kreasion del Union Sovietiko. Los djudios de Bukhara somportaron a los rusos asperando ke ava fin al antisemitismo musulmano. Los rusos se komportaron bien por un tiempo i despues eyos tambien se izieron ntisemitas, siendo kontra la religion. Esto ayudo tambien a traer atras el mal de los musulmanos. Malgrado esto las kondisiones se amejoraron i se fueron ayi djudios de otras partes del pais. En vedra mismo ayi los veian komo enemigos del estado.

Durante el Reinado de los komunistos munchos djudios se fueron a Israel. Miles fuieron de la persekusion de los rusos i de los musulmanos. Una vez ke kayo el Union Sovietiko mas i mas djudios se fueron de ayi. Oy no ay mas ke unas kuantas dezenas de miles en Uzbekistan. Ay 1000 djudios en Tajikistan. Los djudios oy tienen akseso al CHINUH.

Tradusido por Shimon Geron.