Las Notas de Matilda – Sientistas djudiós: GERSHOM SCHOLEM

Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

GERSHOM SCHOLEM
(Berlino, Almania, 1897 – Yerushalayim, 1982)
De Wikipedia -Internet

Gershom Scholem nasio en Berlino kon el nombre de Gerhard Sholem en el 1897, i fue un filozof i istoriador djudio kresido en Almania. El es konsiderado komo el fondador de los studios akademikos modernos de la Kabala, i fue el primer profesor de mistichizmo djudio en la Universidad Ebrea de Yerushalayim. Sus enteresos por la Djudaika toparon una fuerte opozision de la parte de su padre, ma grasias a la entervansion de su madre el pudo azer estudios djudios i talmudikos  kon un rabino. Estudio matematika, filozofia i ebreo en la Universidad de Berlino, ande se metio en kontakto kon Martin Buber, Walter Benjamin, kon Shmuel Yosef Agmon i Hayim Nahman Bialik, kon Achad Aaam i Zalman Shazer. Mientres ke estava en Berna kon Benjamin konosio a Elsa Burckhardt, ke se izo su primera mujer. En el 1919  torno a Almania ande resivio un sertifikado en linguas semitikas en la Universidad de Monako. Manko notable en su karriera fue su establesimiento de la fiktiva Universidad de Muri kon Walter Benjamin. El eskrivio su doktorado sovre el mas antiko livro kabalistiko, el «Sefaer ha-Bahir». Aderiendo al Sionizmo, i enfluensado por Buber en emigro en 1923 en Palestina, se konsakro a estudiar el mistisizmo djudio, i se izo bibliotekario. Kon el tiempo se izo shefe del Departamento de Ebreo i de Djudaika en la Libreria Nasional. Mas tadre  se izo konferensier en la Universidad Ebrea de Yerushalayim. El avlo de la Kabala i de mistisizmo del punto de vista sientifiko i se izo el primer profesor de mistisizmo djudio en la Universidad en el 1933, karga ke tuvo asta el 1965.  Su teoria istriografika kontrasto direktamente kon la teoria del siglo XIX, ke submetia el estudio del Djudaizo a disiplinas komo la istoria, la filolojia i la filozofia. En el 1936 el se kazo kon su sigunda mujer, Fania Freud. Sholem murio en Yerushalayim en el 1982 i esta enterrado kon su mujer en Sanhedria en Yerushalayim. El el bien konosido por su biografia «Sabbatai Zevi, the Mystical Messiah» (1973). Su ovra «On Kabbalah and its Symbolism» (1965) izo difundir la konosensia de la Kabala en el mundo no-djudio. Sholem se opozo a la sentensia de murte emetida por el Estado de Israel kontra Adolf Eichmann, i kritiko fuertemente el livro de  Hanna Arendt «Eichmann in Jerusalem: A Report on the Banality of Evil», i  su mankura de «ahavat Israel».

Matilda Koen-Sarano