eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
CARL DJERASSI
(Viena, Austria, 1923)
De Wikipedia – Internet
Carl Djerassi nasio en Viena en el 1923 de padre djudio bulgaro sefaradi, i de madre austriaka ashkenazia. Es shimista i novelista, i es bien konosido por su kontribusion al dezvelopamiento de la primera pilula kontra el prenyado. Sus djenitores se enkontraron en la eskola medikal de la Universidad de Viena, se kazaron i se fueron a Bulgaria. Djerassi bivio en Bulgaria kon sus djenitores asta la edad de 5 anyos. Despues del divorsio de sus djenitores, su madre i el se transferaron a Viena, para permeterle de entrar en una buena eskola. Asta la edad de 14 anyos frekuento el mizmo Realgymnasium ke avia frekuentado Sigmund Freud, anyos antes, i pasava los enveranos kon su padre en Bulgaria. Despues de la suvida del Nazizmo al poder su padre se kazo de muevo por un kurto periodo kon su madre en el 1938, para permeter a su ijo de fuyirse en Bulgaria, ande bivio kon su padre por un anyo. Carl frekuento el American College de Sofia i se ambezo fluentemente el ingles. En el 1939, a la edad de 16 anyos Djerassi arivo kon su madre a los Estados Unidos, kaje sin un santim. Djerassi frekuento el Newark Junior College en el New Jersey, ke le otorgo un diploma semejante el bakaloreato. Djerassi eskrivio una letra a Eleonor Roosevelt, demandandole ande tenia de ir a studiar, i eya le dio un konsejo velado, ansi ke el topo una eskola i una beka de estudios. El se graduo en shimia organika en el 1942 en el Kenyon College, i lavoro por la Cyba un anyo antes i 4 anyos despues de su graduasion. En la Cyba izo primera patente por el antistaminiko Pyribenzamin. En el 1943 se kazo kon su primera mujer, la amerikana Virginia, antes de resivir su graduasion en la Universidad de Wisconsin-Madison, ande resivio su P.H.D. en el 1945. En el mizmo anyo se izo sivdadino amerikano. En el 1949 entro komo direktor asosiado a las bushkedas en el komplekso Syntex en Mexico-City, ande lavoro del 1950-1951 sovre una mueva sinteza de kortizon, derivada de una konserva meksikana natural. Su ekipo sintetizo el norethindron, ke se izo parte mas tadre de la pilula del kontrolo de los nasimiento, yamada «the Pill». Del 1952 al 1959 se izo konferensier de shimia en la Wayne State University i torno a la Syntex del 1957 al 1960. Del 1959 el se izo profesor de shimia a la Stanford University i prezidente del Laboratorios de la Syntex en Mexico-City i Palo Alto. Su koneksion kon la Syntex lo izo un ombre riko, i el merko un grande pedaso de tierra en Woodside, 
California, ande se fraguo una ferma-kastiyo, i se formo una grande koleksion de arte. De su sigunda mujer, Norma Lundholm el tuvo dos ijos, Dale, ke aze filmos dokumentarios, i Pamela, ke era artista i se suisido en el 1978, i en memroia de la kuala el fondo la Djerassi Resident Program (DRAP), ke kon el tiempo transfero en San Francisco. El fue kazado i kon Diane Middlebrook, profesor emerita de Stanford, asta su muerte por overdoza en el 2007. Djerassi prevido ke la pilula iva tener una grande emportansa en el proseso entre mujeres i ombres, i avlo de la feminizasion del ombre, ke proviene de la feminizasion sosial de leyes i valores en favor de la mujer en la sosiedad. Djerassi resivio la «National Medal of Sciences» del Prezidente Nixon. En el 1975 resivio la «Perkin Medal». En el 1978 fue entrodusido en la «National Inverntors Hall of Fame». En el 1991 resivio la «National Medal of Technology», i en el 1992 la «Priesteley Medal». Austria kito un pul kon su kara i le mando un muevo pasaporto de Austria i en el 1999 le otorgo la «Austrian Cross of Honor for Art and Science», Primera Klasa. El es el autor de la novela «Cantor`s Dilemma», ande eksplora la etika de la moderna bushkeda sientifika, atraverso su protagonista, el doktor Cantor.
Matilda Koen-Sarano
