eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
AARON VALERO
(Yerushalayim, 1913 – 2000)
De Wikipedia – Internet
Aaron Valero nasio en Yerushalayim en el 1913 en una destingida famiya sefaradia, ke se avia establesido en Palestina al prinsipio del 1800 de parte de padre, i en el 1400 de parte de madre. Su tarapapu, Jacob Valero, fondo la primera banka en Palestina. Aaron Valero fue un mediko i un edukator israeli, ke ayudo a fondar ospitales i eskolas medikales, publiko emportantes ensayos medikales i kontribuyo grandemente al adelantamiento de la edukasion medikal en Israel en la sigunda metad del siglo XX. El estudio en la Gymnasia Ivrit en Yerushalayim, i resivio un M.B.Ch.B. en la Universidad de Birminghalm en Inglitierra. Tornado a Yerushalayim, se dio volontario a lavorar en el Ospital Hadasa en Yerushalayim en el 1939. En el 1941-1946, durante la Sigunda Gerra Mondial sirvio komo volontario en el «Medical Corp» de la armada britanika, i arivo al grado de major. En el 1946 se unio al ekipo del ospital britaniko de Haifa, ke mas tadre se transformo en el ospital Rambam, del kual el fue el fondador. En el 1948-1949, durante la Gerra de Endipendensia el sirvio komo doktor de rejimento en el fronte del Nord. En el 1956 se izo shefe del Departamento de Medisina Interna en el osptal Poriya. El fue el primer a rekonoser i a deskrivir el eklatamiento de la peste bubonika en Palestina. Al prinsipio de los anyos `60 el doktor Valero deskuvrio el potensial de la enerjia kondjunta entre el personal kliniko en el Ospital Rambam de Haifa i los enjenieres en el Instituto de Tehnolojia del Tehnion de Haifa mizma. El organizo i reunio ekipos de las dos institusiones, ke enkaveso. Esta kooperasion spesial jenero el Biomedical Engineering Department del Tehnion, i dio komo primer produkto un kondjenyo kapache de enrejistrar las pulsasiones arteriales, i los eventos mekanikos del korason, sin tener kontakto kon la kasha torachika. Este kondjenyo fue deskripto por la primer vez en el «American Journal of Cardiology» en el 1967.
Su primer livro «Clinical E.C.G.» fue publikado por la Kaza editora del Tehnion, i su sigundo livro «Beside Detection» fue publikado en el 1980.
En el 1980 se izo dekano de la Edukasion MedikaL de la Fakultad de Medisina del Tehnion. Del 1980 al 1986 fue i shefe del Departamento de Medisina Interna en el Ospital de Naariya. Aaron Valero ensenyo a numerozas jenerasione de estudiantes israelis i medikos rezidentes. El murio en el 2000. En el 2002 fue fondado el Fondo Aaron Valero por el adelantamiento de la edukasion medikal por la famiya Valero en memoria del Doktor Aaron Valero.
Matilda Koen-Sarano
