eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Ygael Tumarkin
(Desden, Almania, 1933)
De TheArtFair i Answer.com
Ygael Tumarkin es un pintor, desinator i skultor israelí, nasido en Almania en el 1933. Su famiya deshó la Almania en el 1935, i él estudió en la Eskola Téknika en Tel-Aviv asta el 1949. Después de aver servido en la armada, tornó a Almania en el 1953 i lavoró asta el 1961 kon Bertold Brecht, realizando en el 1956 planes para la opera «L`alma buena de Sechuán». Su lavoro en substansia kontiene siempre su reaksión impulsiva a algunos de los problemas bázikos del ombre en muestro tiempo. Su lavoro es imprento de las eksperiensas de la gerra, ke desharon sus siyo sovre su vida, dezde su chikés.
Ruína i destruksión son los elementos konstantes de su variada ekspresión artístika. En el 1957 desinó shenas de teatro en Olanda, Almania i Israel, i en el mizmo tiempo kreó ovras de bronzo i de fierro. Del 1961-63 él tuvo varias muestras a solo en Yerushaláyim (Bezalel), en New York i París i en varios lugares en Almania. Además él djiró el mundo kon munchos grupos de espektaklos. Tumarkin reprezentó Israel a la Biennale de Venezia en el 1964, i en San Paulo de Brazil en el 1967. A la fin del 1969 él empesó a uzar poliedros de nerosta en sus skulturas, komo se vee en el omenaje a Albrecht Durer, (Hayfa, 1969). El partisipó además al omenaje a Durer, ke tuvo lugar en Norimberga en el 1971. Sus ovras fueron merkadas por importantes koleksionista, institusiones i muzeos, komo el Muzeo de Israel, i el Muzeo de Tel-Aviv, el Muzeo de Arte Moderna en New York, la Tate Gallery en Londra, el «Art Institute» de Chicago, el Muzeo de Arte Moderna en Roma, i mas. Monumentos ke Tumarkin desinó fueron erijidos en toda Israel. Su ovra «Olokausto i Renesans», situada en la Plasa de la Munisipalidad de Tel-Aviv desperta un grande entereso. Tumarkin resivió el Premio Sandberg.
Matilda Koen-Sarano
