eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Yaakov Agam
(Rishón Letzión, 1928)
De Wikipedia
Yaakov Agam, skultor i artista sperimental israelí, nasió en Rishón Letzión en una famiya relijioza kon el nombre de Yaakov Gipstein.
Agam se exersó en la Akademia de Arte i Desén Bezalel en Yerushaláyim, antes de irse, antes a Zurigo i después a París, ande se establesió. Su primera muestra a solo tuvo lugar en la Galerie Graven, i en el 1955 él se afirmó komo uno de los mas sovresalientes pionieres de la arte sinétika en la exibisión «Le Mouvement» en la Galería «Denise René», endjuntos a artistas komo Jesús Rafael Soto, Carlos Cruz Diez, Pol Bury, Alexander Calder i Jean Tinguely.
La lavor de Agam es en jeneral abstrakta, es arte sinétika kon movimiento, partisipasión del espektator i uzo frekuente de luz i son.
Sus mijores ovras son la «Doble Metamorfoza III» (1965), la «Orkestrasión de Múzika Vizul» (1989), las fontanas en el distrikto La Défense en París (1975), i en la Plasa Dizengoff en Tel-Aviv (1986).
El es además konosido por un tipo de stampa, konosida komo «Agamograf», ke uza una manera radikalmente diferente de prezentar las imajes, ke depende del ángulo del kual vienen vistas. Esta téknika lentikolar fue exekutada en la «Complex Vision», ke adorna la fasada del Callahan Hospital en Birmingham, Alabama.
En el 1996 fue otorgada a Yaakov Agam la medalya «Jan Amos Comenius» por la UNESCO por el «Metodo Agam» para la edukasión vizual de las kriaturas.
Matilda Koen-Sarano
