eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Eliezer Weishoff
(Yerushaláyim – 1938)
De Wikipedia en ebreo
Eliezer Weisshof nasió en Yerushaláyim en el 1938. Es un artista ke ópera en Israel en munchos kampos artístikos dezde los anyos ’50 del siglo pasado. Mahané Yeudá, el kartié ande mora, fue la fuente de munchas de sus ovras en los kampos de la pintura i la skultura. El empesó sus studios en la Akademia de Arte «Bezalel» en el 1954, kuando tinía 16 anyos. A la fin del primer anyo de studio ganó una beka para todos sus anyos de studio, ke terminó komo estudiante ekselente en el 1958. En el 1968 tornó a «Bezalel» komo konferensier i dochente.
En la armada él sirvió en el jurnal «Mahané Hagadná», komo dekorator i redaktor artístiko. Kuando salió de la armada, empesó un lavoro artístiko intensivo ke se ekstendió en lavoros de pintura i skultura. En el 1967 tuvo su primera mostra a solo en Tel-Aviv. Dezde entonses tuvo numerozas mostras de sus lavoros a solo en Israel i al estranjero. Sus kreasiones akompanyaron i akompanyan el Estado de Israel, i son ekselentes ekspresiones artístikas, ke dieron al autor una fama internasional. Sus lavoros monumentales kontribuyeron i kontribuyen a krear el panorama de sus ambientes, i tienen un klaro mesaje artístiko, edukativo i kultural. En los sitios del rekordo, planeados por él, Weisshof materializa el sujeto de la memoria, uzando una fuerte lingua de símbolos, en un estil de orijinalidad únika.
Es emposible mensionar todas sus ovras. Es sufisiente akodrar los kampos de eyas. Weisshof sovrasale en la skultura monumental. Akodraremos sólo el monumento»Los Buchukes» en la Vaye de los Pinos a la entrada de Yerushaláyim en memoria del atentado a los gratasielos buchukes en New York en el 2001. El monumento es akompanyado por una medalya governamental i un timbro. Akodraremos la sería de animales, ke se topan en munchas galerías de arte, i los sienes de kuadros a azeyte, los desenes i las litografías, ke reprezentan panoramas i figuras de Yerushaláyim i del porto de Yafo. Weisshof kreó munchos posters artístikos sovre sujetos nasionales komo las gerras de Israel, el enkontro entre Begin i Saadat i mas. Weisshof desinó diezenas de timbros de Israel i munchas serías de timbros para las Nasiones Unidas. Kreó munchas serías de medalyas para la «Sosiedad Governamental de Medalyas i Monedas». La bankanota de 50 shekalim kon la figura de Agnón, kreada por Weisshof, es konsiderada spesial por sus elementos dekorativos. Weisshof planeó munchos paviyones i muzeos en Israel i en el mundo, publikó varios livros, dekoró munchos livros para kriaturas, i desinó munchas piesas de djoyería, para H.Stern i otros prestijozos djoyeros.
Matilda Koen-Sarano
