Las Notas de Matilda – Pintores djudiós: David Rakía

Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

David Rakía
(Viena, 1928)
De Israelartguide

David Rakía nasió en Viena  i arivó a Israel a la edad de 10 anyos. A la fin de la Gerra de Indipendensia empesó a estudiar kon el artista Ardón i después en “Bezalel”.  Del 1955-1960 estudió en la “Ecole des Beaux Arts” en París. Sus primeras muestras en estil surrealíko i simbóliko, tuvieron lugar en akel tiempo en el Muzeo de Arte Moderna en París, komo en Suisa. De su retorno a Israel en el 1960, empesó una sería de desenes ande las letras ebreas tienen un rolo sentral. Después de un anyo tuvo lugar en el Muzeo de Tel-Aviv una anche muestra de su lavoro.  Después de la Gerra de los Sesh Días, Yerushaláyim se izo el tema sentral del lavoro del pintor. La sivdad, komo esensia del destino nasional, fue konkretizada sea realistikamente i sea simbolikamente, atraverso murayas i plantas, ande las letras tienen de vez en kuando formas figurativas i abstraktas. En los anyos `70 en su lavoro entró un espírito muevo: aparesen kavayos akompanyados por instrumentos muzikales. A vezes la luz es vedre, blu o kolorada; a vezes es konsentrada en un sírkolo o aparese difundida.

La luz es una de las mas fuertes ekspresiones en el mundo, reflektado en la arte de Rakía. Las formas i las kolores keren interpretar los siklos kózmikos de tiempo, luz i sonido. El ombre aparese raramente en estos lavoros, porké el pintor prefera meter en sus ovras su aspirasión a entender i a tokar el ermozo sistema ke arrodea su existensia.  Rakía krea su lavoro artístiko en Yerushaláyim, mas ovras ya está en mas de 50 exibisiones individuales en muzeos i galerías en el mundo entero, i se topan también en emportantes koleksiones de arte.

Matilda Koen-Sarano