Las Notas de Matilda – Pintores djudiós: David Palombo

Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

David Palombo
(Yerushaláyim, 1920 – 1966)
De «Israeli Art Center» i «Blogamit»

 

David Palombo, eskultor i pintor sefaradí, nasió en Yerushaláyim en día de Kipur. Su padre se fuyó de Turkía a Ejipto, para no servir en la armada turka. David estudió por 8 anyos en la Eskola Aliansa i a 14 anyos deshó la eskola para ir a lavorar a la posta, ande kedará  por 27 anyos, empesando komo postadjí, para terminar komo teknisén superior, en kondisiones de lavoro muy duras. En el 1940 él tomó un anyo sabátiko i fue a estudiar pintura en Bezalel, kon A. Aschheim. Este lavoro le plazió tanto ke se djubiló antes del tiempo de su lavoro en la posta, para dedikarse a la arte. En el 1942 lavoró en skultura kon Zeev Ben Zvi, ke fue su amigo i su maestro spiritual. El se ambezó a lavorar kon todos los djéneros de materiales: tierra, lenya, piedra i sovre todo kovre. En el 1948 se fue a París, ande lavoró kon Constant. Aunke sefaradí fue muy sensible al sujeto de la Shoá, i munchos de sus lavoros verten sovre este sujeto.

El ensenyó por tres anyos en Bezalel.  En el 1950 tornó a la skultura en fierro, i avrió un estudio en el Monte Sión.  En el 1954 kreó su primera skultura abstrakta de lenyo. En el 1956 estudió mozaika kon el profesor Orselli en Ravenna. En el 1960 él izo las puertas del Oel Yiskor en Yad Veshem, en 1961 izo skulturas para la Kaza Sherover, en el 1962 izo la puerta del Instituto de Arte, Hein Harod, i tres fontanas i una pared de mozaika para Yad Vashem. Del 1962 al 1964 él realizó skulturas en Bezalel. En el 1965  izo las Puertas de la Knesst, ke mizuran 18 metros de largor i 3 de altor,  i toman su nombre. En el 1966 Palombo resivió el Premio Unesco por la puerta de la Sala de Rekordo en Yad Veshem. El murió en el 1966 en un aksidente de motosikleta.

Matilda Koen-Sarano