eSefarad Noticias del Mundo Sefaradi
Djohá tinía dos aznos i kería poderlos destingir para ver kuanto komía kada uno d’eyos.
Komo no estava reushendo, le disho un amigo: «Kórtale a uno los pelos de la kola. Ansina vas a ver ke son diferentes.»
Djohá le kortó a uno los pelos de la kola i pudo distingirlos. A la noche vinieros kasadores i le kortaron i al otro los pelos de la kola.
Le disho el amigo a Djohá: «Saves kualo? Kórtale a uno de los dos la kola… No ay nada…». Djohá se la kortó, ma a la noche pasaron otra vez los kasadores i kortaron la kola i al otro.
Por la tresera vez, sigún el konsejo de amigo, Djohá kortó una oreja a uno de los aznos, ma i esta vez los kasadores kortaron la oreja al otro.
Le disho el amigo: «Mizura la altura de los dos, ansí savrás kual es el alto i kual el basho». I ansí izo Djohá.
El amigo lo enkontró de muevo i le demandó: «Los mizurates?»
Le respondió Djohá yeno de entuziazmo: «Siguro! El azno blanko es mas alto del azno preto. Agora puedo destingir entre eyos.»
Kontado por MATILDA KOEN-SARANO – 2017
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
