eSefarad Noticias del Mundo Sefaradi
Avía una vez un senyor muy riko, ke azía una vida regalada. No le mankava nada. El kería todo i lo obtenía. Pero el tiempo pasava, i él se dio kuenta ke estava serka de la ora del Dio, i ke en algún momento tenía ke ir a renderle kuento al Senyor Rey, Patrón de todo el mundo.
Este senyor tenía tres klases de amigos:
1) Unos ke lo akompanyavan de día i de noche, ke estavan siempre onde estava él.
2) Otros ke vía no tanto frekuentemente, pero ke lo vían a él kon una sierta frekuensia.
3) Otros ke los vía muy raramente i ke a lo largo de su vida los vido muy pokas vezes.
Kuando le estava yegando el momento de partir de este mundo, les demandó a los amigos del primer grupo ke lo akompanyaran enfrente al Rey, komo lo avían echo toda la vida. Pero éstos refuzaron de akompanyarlo i lo desharon solo.
Les demandó a los del segundo grupo ke izieran lo mizmo. Pero éstos le respondieron ke lo podían akompayar sólo asta la tomba, i ke no podían segirlo mas ayá.
Entonses él, triste, les demandó a los del treser grupo ke lo akompanyaran, i éstos le respondieron imediatamente: “Sí, mozotros te vamos a kustodir siempre, vayas onde vayas!”
Aklaremos el simbolizmo del kuento:
Los amigos del primer grupo konstituyen las rikezas, los amigos ke vienen kon éstas i todos los bienes materiales ke kedan en el mundo, kuando uno parte al mas ayá.
Los del sigundo grupo son los parientes i la famiya ke sólo lo pueden akompanyar asta la tomba.
En kambio, los del treser grupo konstituyen las buenas ovras i la sedaká ke él izo en su vida. Las buenas ovras son la únika koza ke el ombre se puede yevar kon sí, para amostrarle al Ke no se puede mentar, komo mérito para la vida en este mundo.
Kontado por ESTER COHEN – 2002
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
