eSefarad Noticias del Mundo Sefaradi
Mi padre, kuando se izo pensionado, resivió de la munisipalidad la karta de pensionado, ke konfirmava su muevo estado i le dava sus derechos.
Una demanyana desidió mi padre de partir a Yerushaláyim.
Se fué a la stasión del treno i kijo merkar un bilyeto de ida i venida, ke es mas barato.
Kuando le disho el kashero el presio del bilyeto para ir i venir, le amostró mi padre su karta de pensionado, demandando su derecho de reduksión komo pensionado.
Ma el kashero le disho ke no puede resivir dos reduksiones.
Le demandó mi padre: »Ke kijo dizir esto?»
Le respondió el kashero: »Puedes resivir un bilyeto de ida i vinida kon su reduksión o un bilyeto de ida kon la reduksión de pensionado.»
Mi padre se riyó i eksklamóo delantre el kashero i la djente ke estava en la kola: «Vuestro punto de vista es ke el pensionado se va i no torna!»
Kontado por ISRAEL MAZLIAH – 2013
Notado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
