eSefarad Noticias del Mundo Sefaradi
Pésah en Roma
Dos perros ambiertos – uno kristiano i uno djidió – estavan djirando por las kayes de Roma, bushkando alguna koza de komer.
Ensupitó vieron de leshos un gueso i korrieron a ken lo tomará.
El perro kristiano lo aferró kon la boka i se aleshó para mashkárselo en paz, ma el perro djidió le korrió detrás, lo kedó i le demandó: «Komo se yama akeya fiesta vuestra ande sonan las kampanas i vozotros komésh munchos guevos de chikolata?»
«Pas.ha!» disho el perro kristiano i el gueso le kayó de la boka avierta anchamente.
Pishín el perro djidió aferró el gueso en la boka i se aleshó para komérselo.
Se disho el perro kristiano: «Agora le vo azer yo también la mizma demanda, para ke le kayga i a él el gueso de la boka.»
Se le aserkó i le disho: «Komo se yama akeya fiesta vuestra ande vos es defendido de komer pan, i komésh sólo masá?»
«Pésah!» disho el perro djidió, en serrando bien los dientes sovre el gueso, ke esta vez no kayó.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
