eSefarad Noticias del Mundo Sefaradi
La mujer djusta
El ijo del rey kería kazarse, i le demandó al padre, el rey, ke le bushke una mujer.
El rey salió a la sivdad, para bushkar una mujer para el ijo.
Las mujeres ke oyeron esto, vinieron ande el rey, i el rey demandó a kada una:
“Kuantas vezes lavas el arroz?”
Una le disho: “Dos vezes”.
La otra le disho: “Tres vezes”.
I ansina él demandó a todas, asta ke entró una muchachika verguensoza, il rey le demandó: “Kuantas vezes lavas el arroz?”
La muchachika lo miró kon sus ojos ermozos i le disho: “Ke kijo dizir kuantas vezes? Mozotros lavamos el arroz, asta ke sale la agua limpia!”.
I el rey le disho: “Tú vas a ser la mujer de mi ijo!”
Kontado por KEREN SHAMAY – 2000
Notado i redaktado por Matilda Koén-Sarano
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
gracias queridos amigos por existir jag sameaj januka abrazos desdeisrael amen vv’ amen
Mui buenos cuentos Matilda io los leyo kada semana, gracias