eSefarad Noticias del Mundo Sefaradi
Gradasión de bovedá
Un día el rey yamó a Djohó i le disho: «Djohá, kero ke me agas una lista de los mas bovos de la sivdad, en orden de bovedá, del primer al último».
«Bueno» le disho Djohá
Después de pokos días Djohá vino ande el rey i le amostró la lista.
I ken estava al prinsipio de la lista? El rey!
El rey vido la lista i se kedó estoriado.
«Komo?!» le disho a Djohá, «Yo sería el mas bovo de la sivdad? I porké?»
Le disho Djohá: «Sinyor rey, no es verdá ke un anyo antes dates parás a uno, para ke te merke kavayos, i asta agora el ombre no se izo deynda ver?»
«Sí,» le disho el rey, «ma yo estó siguro ke presto él ya va a vinir i me los va a trayer.»
«Bueno,» disho Djohá, «kuando akel va vinir, yo vo kitar tu nombre de la lista, sinyor rey, i vo meter el suyo!»
Kontado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
