eSefarad Noticias del Mundo Sefaradi
En prizion por una bamia
Mi papa es de Turkia, de Estambol. En Espanya no ay bamia, no ay, i le dezeo l’alma komer bamia. Le eskrivio a la ermana ke le mande bamia.
I eya komo se la va mandar? Las metio en un ilo, las seko, las metio en un paketiko, i lo mando a Espanya, a Barselona.
Esto yego a la duana, i eyos avrieron el paketo. Ven una yerva seka.
Fueron a la kaza de mi papa i le dizen: “Usted es Nisim Rofe?”
El dize: “Si”.
Dizen: “Bueno, venga kon nosotros a la polisia, poke le mandaron droga”.
“Ke droga?… Ke kere dizir droga?…”
“Este paketo vino de Estambol, i aki esta eskrito Nisim Rofe”.
“Si, soy yo”.
“Entonses son suyas las drogas!”
“Esto se kome!”
“Usted lo komen? No lo fuman?”
“No se fuma, se kome”.
“Bueno, venga dentro!”, i lo metieron tres dias en prizion.
Avia aya un kapitan ke disho: “Puede ser… este senyor… tiene razon…”
Lo mandaron a la Universidad de Barselona, para ke vean kualo es. I aya un profesor les disho: “Si, esto es una koza ke se kome. No es droga”.
Bueno, se lo yevo este kapitan a la kaza de mi papa, para ke mi madre lo gize. Lo metieron en agua i se unflo.
Mi mama lo gizo i se lo komieron. I ansi lo desharon a mi papa, si no lo metian adentro.
Kontado por MALKA MIZRAHI – 1999
Notado i redaktado por Matilda Koén-Sarano
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Qué lindo recuerdo. Yo también me crié comiendo ba’amia. Ahora vivo en California, EEUU y tengo esta planta en mi jardín. Así nunca me faltará mi muy querido plato guisado.