Las Notas de Matilda – Kantadores de la tradisión djudeo-espanyola: Nico Castel

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

NICO CASTEL
Kantador de ópera i maestro de kanto i de diksión
(Lisbona, Portugal, 1931)

Nico Castel nasió en Lisbona en el 1931, kresió en Venezuela kon parientes  poliglotas i una nany almana, i fue a una eskola franseza. El es desendiente de una famiya sefaradía kon raízes en la Castilya del siglo XV. A la edad de 16 anyos se fue a New York para azer la karriera de kantante. En el 1958 ganó el primer premio en el konkurso «Joy in Singin», ke promovió su karriera de ópera kon un resital en la New York Town Hall. En el mizmo anyo él debutó en la Santa Fé Opera en el  «Falstaff» de Verdi. Después muy presto él debutó en la New York City Opera i en el 1969 en la Metropolitan Opera, ande kantó por 35 anyos, i por mas de 25 anyos izo parte del staff ke ambezava diksión.  Castel avla portugés, almán, fransés, espanyol, italiano i inglés komo un nativo, i es un maestro de lingua i de diksión konosido en los Estados Unidos i  internasionalmente. Tiene mas de 200 rolos de ópera en su repertorio, i izo el djiro del mundo de México-City a Helsinki, de Lisbona a Caracas, de Firenze i Spoleto a Tel-Aviv, i de los Estados Unidos kon varias kompanías de ópera. En el 1992  fue nominado profesor de múzika adjunto en la Boston University. Su sigunda mujer Carol Cates Castel ambeza kanto en Spoleto en la fakultad de la «Vocal Arts Symposium». El kuple Castel es el fondador de la «New York Opera Studio», i tiene un programa para djóvenes artistas en kursos intensivos de enverano en el Vassar College. Castel mora en New York i tiene un ijo i una ija.  Entre las enrejistrasiones de Castel están las óperas «Manon» i «Los kuentos de Hoffmann». Su atadijo kon la múzika en ladino le viene de su desendensia familiar. Su konosensia i sus performansias de la múzika de los sefaradís es bien konosida i apresiada en el mundo entero. Además de los konsertos i los resitales de esta múzika por los pasados 40 anyos, él enrejistró un album entitolado «Sefarad», i eskrivió el  «Nico Castel Ladino Song Book» ke salió en New York. Su amor por la múzika djudía se ekstende también a una vasta konosensia  de las kantigas en yidish. Además él dedikó su vida a estudiar i a  interpretar múzika litúrjika i fue kantor reformista por mas de 27 anyos en varias sinagogas de New York. Su pasión por toda la múzika espanyola se ekstende a la Iberia i a la Amérika Latina, ke inkluye exótikas inkursiones en los repertorios atzeko, basko, gayego, katalan, braziliano i portugez. El publikó el «Spanish Vocal Repertoire
Classes» i el «Singer`s Manual of Spanish Lyric Diction».

VIDEO: LA VIDA DO POR EL RAKI – NICO CASTEL