Las Notas de Matilda – Kantadores de la tradisión djudeo-espanyola: Kobi Zarko

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

 
Kobi Zarko
(Israel, 1952)

 Kobi Zarko nasió en Israel en el 1952 de djenitores provenientes de Turkía i de Salonik. Se ambezó las kantigas ke kanta de sus nonos i de su madre. Es uno de los reprezentantes de la mas djoven jenerasión de kantadores del folklor sefaradí prezentado en manera la mas auténtika. El es también aktivo en el kampo de la konservasión i el arrebivimiento de la kultura i del folklor djudeo-espanyoles.
Su romanso kon el ladino (komo lo definió él mizmo), empesó después de una nochada en Yerushaláyim en memoria de Isaac Levy, ande se metió en kontakto kon Kamelia Shahar de «Kol Israel». En prinsipio enrejistró kantigas i romansas en el studio de la Radio, en el Teatro de Yerushaláyim, kon al piano Haim Tsur.
Empesó a kantar en las nochadas organizadas por la asosiasión «Sefarad» en Yerushaláyim ansí ke en el Seminario Levinsky i ayudó a fondar el Sírkolo de Ladino en Tel-Aviv.
Kon todo lo ke tenía en sí i lo ke estuvo arrekojendo de kantes, romansas, imnos ets. empesó a dar resitales en kazas de repozo i sentros komunitarios kon el enkorajamiento de la Asosiasión «Sefarad»..  En el 1992 partisipó al primer kongreso mondial de ladino ke tuvo lugar en el «Muzeo ‘Haaretz» en Tel-Aviv, i en el 1999 partisipó al kongreso mondial organizado en Yerushaláyim por la Autoridad Nasionala de Ladino i su Kultura.
El demonstra un grande dominio de la shena i una grande komplisidad kon el públiko. Su konosensia del ladino es perfekta. El da i konferensias sovre el kante djudeo-espanyol, sus raízes i sus enfluensias. Izo turnés de resitales en Almania, Fransia, Espanya, México i Sud Amerika. En Israel es konosido i amado en todos los sírkolos de ladino, komo kantador, komo moderador de evenimientos i konferensier. Su repertorio es inmenso, i va de romansas a kantigas en ladino,  en turko, en grego i en ebreo. 
Kobi enrejistró kon el Instituto Renanot la komedia múzikala «Los kantes de Ester» de Shlomó Reuvén (1994). Partisipó komo aktor en el radiodrama de Matilda Koén-Sarano «Sefaradís de dor en dor» (1999) i en otros skeches  de inisiativa de «Sefarad». Partisipa kada anyo al Festival de los Kontadores komo kontador de kuentos i moderador en ladino i en ebreo, i es el animador  de lo 4 «Días de leche i miel», organizados por el Klub de Ladino de Haifa, ke ya tiene 9 anyos de vida. Partisipó komo ko-prezentador en el primer Festiladino (2003).
 El está aprontando un CD de kantigas i romansas en ladino i en estos ultimos tiempos esta lavorando kon la muzikologa Dr. Shoshana Weich-Shahak, para la Fonoteka de la Universidad Ebrea de Yerushaláyim, en la enrejistrasión de romansas antikas i ulvidadas ke él resivió de su madre i de su nona, i entre eyas una versión de «Tres damas van a la misa», ke data de la Edad Media.
Kobi Zarko mora en Tel-Aviv, tiene 3 ijos i es viche direktor de una banka en Tel-Aviv.