Las Notas de Matilda – Kantadores de la tradisión djudeo-espanyola: Françoise Atlan

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Françoise Atlan
(Fransia 1964)

Françoise Atlan nasió en Frasia en el 1964 i es una de las  mas emportantes kantaderas de Maroko, no sólo de kantes sefaradís, ma i de kantes árabos, i goza de una ancha popularidad en las komunitás djudía i muzulmana.
 
Eya es dotada de una boz partikolar, dulse, ma no en manera exajerada, fuerte i firme i en el mizmo tiempo delikada, kon una grande spiritualidad, i puede kantar kon sukseso kualker estil de kantes. Eya empesó a kantar kon un profesor en el 1985.
 
Es konsiderada una de las mijores enterpretes de las romansas sefaradías, una kantadera ke tiene una kalidad de boz ke da una grande autentisidad a la múzika. Sus performansias son el rezultado de una envestigasión muzikolójika profundizada, ke demonstra su alto respekto por las tradisiones del djénero.

Sus raízes djudías orientales i su konosensia de la tradisión andaluza le izieron dezvelopar un alto estil ekspresivo ke kombina téknika vokal i sensibilidad sefaradía – la rika erensia de los djudiós ekspulsados de Espanya en el 1492.
 
Tiene una de las mas ermozas bozes spesializadas en kantes del Mediteráneo. A parte los kantes en ladino, eya kanta en oksitano los klásikos lamentos de los trubadures, i las melodías árabo-andaluzas en árabo, ma keda siempre una mujer del Mediteráneo.
 
Del 1998 eya  lavoró  por tres anyos sovre el repertorio árabo-andaluzo de Fez (Maroko). Asta entonses eya aparesió en numerozos paízes i kolaboró kon varios artistas, inkluzo el gitarrista de flamenko Juan Carmona i los Ermanos Chemiranis.

Françoise Atlan publikó 5 CDs: «From the rose to jasmine», «Romances Sephardies: Noches», «Romances Sephardies», «Andalussyat» i «Traces De Lumiere».

[print_link]