Las Notas de Matilda: «DECILE A MI AMOR» Cantares judeo-españoles de Tetuán

Un ermozo disko de kantes djudeo-espanyoles de Tetuán salió por la investigasión artistika I la direksion de la Doktora Susana Weich-Shahak en el Sentro de Investigasion de Muzika de la Universitá Ebrea de Yerushalayim.

La lingua ,en la kuala, son eskritos los «Cantares» es la haketia (el djudeo-espanyol oxidental), mientres ke el «libretto» esta eskrito en tres linguas: espanyol, ebreo i ingles.

Vamos a segir paso paso el «libretto», ke empesa kon la istoria de Tetuán, ke venia yamada por los djudiós «La pequeña Jerusalen» (La chika Yerushalayim).

Los primeros «cantares» sitados son los kantes de boda, komo «Decile a mi amor», ke venga i ke me tome. «Estas Casas», yenas de alegria de boda, «La novia se bañaba», «Eres Chikita i Bonita», kante de djogos de amor, i «Viva Ordueña». Kante i bayle de boda, uzado en una sosiedad agraria.

Entre los «Romances» (romansas) topamos algunos ke konosemos muy bien, komo «Una ija tiene el Rey», la ija del Rey ke esta pronta a salir a la gerra para liberar a su amor ke esta prizionero. «Esta Rahel lastimosa» Esta Rahel La estimosa», romansa ke mos propoza un problema grave: Rahel es kulpavle o no? «Mose salio de Misrayim», para ir a salvar su puevlo de las manos de Paró.

Entre las «Coplas» topamos «Adjuntaronse las flores», ke son koplas de Tu-Bishvat, «Esta noche de Purim», ande topamos el testamento de Haman, «Hi Torá lanu nitana», ke deskrive la donasion de la Torá en la Fiesta de Shavuot I «Buena semana mos de el Dio», ke demanda al Dio, salud i parnasá al momento de la Havdalá para la semana ke viene.

El ultimo sujeto es el Repertorio Moderno.

Komo en munchos otros lugares, i en Tetuan nasieron kantes muevos sovre melodias populares, komo «De una al’Azba si vieras», vals de kurtizamiento de Nesim i jolita, ke es un swing. «Este bulevar «kante ke kritika la moda mueva i provokante de los fostanes de las mujeres. «Un dia de Timimona» un pasodoble umoristiko ke deskrive la situasion de las djovenes mujeres, ke kedan solas, a kavza de la emigrasion masiva de los ombres de Tetuan.

Investigasión i direksión artistika: Dr. Susana Weich-Shahak
Orit Perlman, boz
Yarden Erez boz i munchos estrumentos
Zeev Yaniv, boz i estrumentos
Dr. Susana Weich-Shahak, boz i castañetas

Este disko mos ambeza munchas koza ke no saviamos i por esto dizimos grasias de korasón a los ke partisiparon a su kompozisión.

Matilda Koen-Sarano
2019

 

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…